Rokstu sagataveja: portals lakuga.lv

Gribīs, kab ļauds itamā vosorā mīļuotu i īsamīļuotu – ar taidu viestejumu klauseituojums ar sovu jaunū dzīsmi “Atmosfera” īpazeistynoj grupa “Borowa Mc”. Reizē ar dzīsmi grupa aicynoj iz vosorā gaidomajim koncertim Leivuonā i Rēzeknē.

Dzīsmis “Atmosfera” autori ir grupys “Borowa Mc” dalinīki Aigars Runčis i Guntra Kuzmina-Jukna, bet dzīsmis producents – Fakts (Jānis Šmēdiņš). ““Atmosfera” ir par mīlesteibu – kai pyrmū romantiku, tai ilgom attīceibom. Ituos dzīsmis īdviesme atguoja draugu kuozu ceremonejā, kod redzēju laimeigūs ļauds i dzierdieju vysus lobūs vielejumus jaunajam puoram. Ūtrei daļa ir par tū, kai mes ar sīvu asam kūpā gondreiž divejis godu desmitis i arviņ mīlesteibā,” par dzīsmi stuosta Aigars.

Dzīsme, kas ir pyrmais grupys singlys itūgod, topuse grupys rodūšuos nūmetnis laikā pārnejā vosorā Latgolā, demo verseja īraksteita vasarneicā, kas beja pīlāguota studejis vajadzeibom. “Atmosferu” jau niu var nūsaklauseit popularuokajūs muzykys straumiešonys servisūs.

Leidza ar jaunū dzīsmi grupa aizsuoc gataveišonūs vosorā paradzātajim koncertim – julī grupu varēs dzierdēt Leivuonā, bet augustā byus pīsadaleišona lelkoncertā “Dzimis Latgolā” Rēzeknē.

Atguodynuojumam – grupa “Borowa Mc” dybynuota 2004. godā i sovys darbeibys laikā izdavuse treis studejis albumus. Grupā dorbojās Aigars Runčis, Guntra Kuzmina-Jukna i Ingars Gusāns.