Kulturys īsacejumi nedeļai: pagastej Viļānūs i uzsmaidi cytim
Rokstu sagataveja: portals lakuga.lv
Niu suokusēs vosora, kas nūzeimoj tū, ka cylvāki vaira ļaunās atvalinuojumu prīcai i giun aktivuos atpyutys īspiejis. Ituos nedelis kulturys īsacejumūs Viļānu nūvodpietnīceibys muzeja vadeituoja Margarita Skangale aicynoj pagasteit Viļānus, apsaverūt naviņ jaunu izstuodi, tok ari aktivā veidā īpazeistūt Viļānu kulturviesturiskuos vītys. Taipoš gaideituos vosorys suokys asociejās ar pozitivom nūskaņom, deļtuo sevkurs ir aicynuots uzturēt saskaneigu vidi apleik i saskarsmē ar cytim.
Sasatikt ar godalaikim
Mes dzeivojam cīši skaistā vaļstī, kur ir četri godalaiki. Cytuos vaļstīs nav vareibys baudeit vysu godalaiku sovpateibu, kur kotrys nu tūs roda sovys sajiutys. Kai reiz tagad nu 3. juņa da 2. septembra Viļānu nūvodpietnīceibys muzejā ir apsaverama cīši skaista muokslineicys Agrys Ritinis gleznu izstuode “Gadalaiku satikšanās”. Apmeklejūt izstuodi, eistyn varit sasatikt ar vysim četrim godalaikim.
Karteņa: Agrys Ritinis izstuode Viļānu nūvodpietnīceibys muzejā, foto Marta Puzāka/portals lakuga.lv
Izstaiguot Viļānus kuojom
Tagad suocās bārnu breivlaiks i pīaugušūs atvalinuojumu laiks, leidz ar tū iz piļsātu nūbrauc kai babeņu unucāni, krystabārni pi krystvacuoku, tai ari pīaugušī atvalinuojumūs pi mamu iz dzymtajom pusem. Kab vysu laiku nav juosiež tik ustobā, mums ir izstruoduots skaists turisma maršruts pa Viļānim sešu kilometru garumā. Mašrutā teik apmaklāti gondreiž vysi piļsātys kulturviesturis objekti. Ka kaids izdūmoj izstaiguot ar sovim gostim Viļānus, apsavērt kulturviesturiskūs objektus, tod lai atīt iz Viļānu nūvodpietnīceibys muzeju i mes īdūsim maršruta karti ar pīturys punktim i tūs skaidruojumim, kur i kas ir radzams.
Karteņa: Viļānu piļsātys turisma maršruts, foto Viļānu nūvodpietnīceibys muzeja arhivs
Naaprunoj, tok uzsmaidi!
Īt vosora, mes asam smaideigi i pozitivi. Kab saglobuotu ituos pateikamuos nūskanis, voi mes navarātu itū nedeļu napuormest i naaprunuot tyvuokūs i apleicejūs? Sovus kolegus, taipoš ari sovu vaļdeibu. Byusim pozitivi, naaprunuosim, napuormessim, tok uzsmaideisim!
Foto Amanda Anusāne/portals lakuga.lv
