Rokstu sagataveja: portals lakuga.lv

Ar singlu “Imūns” sevi pīsoka projekts “Staiguļi”. Kai viestej tuo dalinīki, projekts radeits i dorbojās pi Eiropys austrumu myura Kuorsovys pusē. Da ituo koncertāts pasuokumūs i spālāts zaļumballēs, tok itūšaļt paraleli fizikai, kartem, kosmetikai i kanalizacejis teiklim ir aizsuokts dorbs pi muzykaluos jaunradis. Ar singla izlaisšonu pyrmais mierkis asūt izpiļdeits – byus kū paruodeit unukim YouTube.

Kompaneja, kuruos sastuovā ir pīci puiši (Jurs Vuorkaļs, Einārs Čoičs, Ralfs Punans, Arturs Zeiļuks, Edgars Potašs) i Arita Rancāne, sauc sevi par projektu, na grupu, jo nazyna, kod eisti vyss suocīs i kod tam byus gols. Grupys solists Jurs Vuorkaļs par dzīsmis viestejumu: “Itei dzīsme ir 2012. goda Drycānu kopusvātku bohemys bārns, kuru nūputiejušu izcēlem nu plaukta 2022. godā i pabeidzem rodūšajā nūmetnē Balkanu kolnūs. Dzīsme nav par mīlesteibu, tei ir par prostumu, par vīgluoku skotu iz nūtykumim, kam īmam cauri sev atvālātajā myužā.”

Dzīsmis “Imūns” izlaiduma dīna nav najauša, jo taišni itamā dīnā izlaidums ir ari apvīneibys buņdzinīkam Eināram i basgitaristam Ralfam. Poši smejās: “Saprūtams, kab mozuoki svineibu izdavumi.”

Dzīsmis vuordu autors ir Jurs Vuorkaļs, muzykys – Edgars Potašs. Īroksts taiseits studejā “Bigmaar’s Records” sadarbeibā ar Māri Keišu. Leidz ar dzīsmis publiciešonu izīt ari tuos videoklips, kas radeits sadarbeibā ar muokslineicu Lilly Cinnamon Woods.