Rokstu sagataveja: portals lakuga.lv

Juņa vydā izdūts Dagnejis pyrmais dzejis kruojums “Ups, kūki i mes”. Kruojumā apkūpuoti vaira nakai 70 pādejūs pīcu godu laikā raksteitī dzejūli, kurūs autore kaitojās ar dažaidu volūdu vuordim i simbolim, salīkūt sūpluok jiutu, pruota, piļsātys, lauku, realuos i digitaluos dzeivis paruodeibys i nūtikšonys.

Literate, navaļstiskūs organizaceju aktiviste i jaunīšu projektu vadeituoja Dagneja (aba eistajā vuordā Dagneja Dudarjonoka) dzeju latgaliski roksta jau seņ, tok itys ir autoris pyrmais dzejis kruojums. Da ituo Dagnejis dzeja ir publicāta kūpkruojumūs, par pīmāru, myusdīnu latgalīšu dzejis antologeja “Susātivs” (2008), Ligijis Purinašys, Dagnejis, Janys Skrivļys-Čeveris i Guntys Ločmelis kūpkruojumā “Linejis” (2016) i cytūs, kai ari škārsteiklā, bet dzejis kruojumā “Ups, kūki i mes” apkūpuoti vaira nakai 70 dzejūli. Dzejūli raksteiti latgalīšu rokstu volūdā, tok sovu reizi volūdā īsaskaņ ari Dagnejis dzymtuo – Vuorkovys puse.

Dagnejis dzejūli ir sižetiski – kai ba runojūt par kasdīnys nūtykumim, autore pīsaskar ari filozofiskim vaicuojumim par laiku, dzeivis jāgu, ari par mīlesteibu pret ūtru cylvāku i dažaidom Latgolys vītom. Kruojumam atlaseitajā dzejūļu kūpā autore rauga raksteit par attīceibom, par kūpeigū i atškireigū piļsātā i laukūs, par cylvāku i juo apleicejuos vidis saisteibu, nasabeistūt lītuot ari myusdīneigus i dažaiduos volūduos raksteitus vuordus. “itamā gruomotā daudzi stuosti par pošu skaiteituoju stuosta,” tai Dagneja.

Par sovu pyrmū dzejis kruojumu “Ups, kūki i mes” Dagneja soka: “Asu pateiceiga vysim, kuri koč kaidā veidā pīsadalejuši itūs dzejūļu i kruojuma radeišonā. Kruojumā sasalykuši dzejūli, kas raksteiti pādejūs pīcūs godūs, tok ir ari pa kaidam maņ meilam dzejūļam, kas atrads sovu vītu kruojumā vēļ nu agruoku laiku. Teksti taipat kai es ir kusteigi i kruosaini. Kaids sovu reizi paboksta skaiteituoju pruotu, cyts ir ari pīturzeimem, kab precizuok puorskaiteitu munu dūmu, bet cyts pamasts ar vītu kotra poša breivai interpretacejai.”

Dzejis kruojuma redaktore ir dzejneica, rakstneica i tulkuotuoja Vija Laganovska, muokslineica Dana Vasiļjeva, bet izdeviejs – latgalīšu kulturys kusteiba “Volūda”. Kruojuma izdūšonu atbaļstejs Vaļsts kulturkapitala fonds.

Sarunys fragments ar Dagneju Latvejis Radejis Latgolys studejis latgalīšu literaturai veļteitajā raidīrokstā “Puslopys”.