Rokstu sagataveja: portals lakuga.lv

29. julī Rēzeknis nūvoda Dekšuoru pogosta “Madžuļūs” Latgolys tradicionaluos kulturys centrs aba bīdreiba “Latgaļu sāta” svieteis 15 godu jubileju. Dīnys parādā paradzātys rodūšuos darbneicys vysai saimei, dzīsminīka Vinsenta Kūkuoja koncerts i cyti puorsteigumi, viestej bīdreibys puorstuovi.

“Kam tiks nūdūts tradicionalais kulturys montuojums i kai partū īinteresēt jaunuotni? Itī i cyti sabīdryskī i politiskī vaicuojumi vysleidz bejuši bīdreibys “Latgaļu sāta” viereibā,” stuosta vīns nu bīdreibys dybynuotuoju Daiņs Mjartāns.

Atsaverūt iz bīdreibys padareitim dorbim, Daiņs soka: “Nu pādejūs pīcu bīdreibys darbeibys godu, grybātūs izceļt Andryva Jūrdža fonda pamarku kataloga izdūšonu, kas dūd vareibu kolekcionarim i plotuokai auditorejai īpasazeit ar Latgolys sabīdryskajim, politiskajim i kulturys darbinīkim, kai ari ar zeimeiguokajom Latgolys viesturis nūtikšonom. Reizē izdavums izgaismoj Ūtruo pasauļa kara laikā trymdā nūbraukušūs latgalīšu kulturys i politiskūs uzskotus. Par tū juosoka lels paļdis autoram Zigurdam Svikim i Gregoram Spuogim, ar kū kupā veiduojom ari izstuodi par Jūrdža fonda darbeibu. Ūtrys cīši pateikams nūtykums beja Vinsenta Kūkoja dzīšmu albuma ”Breineigō nosta” izdūšona. Vinsents dasyt pi myusu sirdsapzinis i atguodynoj, cik daudz spāka sevī globoj Latgola, nasaverūt iz tū, ka myusu volūdys vuiceiba nav īkļauta školu programuos.”

Taipoš, pasasokūt bīdreibai “Latgaļu sāta”, 2018. godā tyka pīsaisteiti finansiali leidzekli, kab Rēzeknē tyktu pastateits pīmineklis par gūdu gruomotu izdeviejam Vladislavam Luočam.

Cytastorpā, Daiņs Mjartāns ari aicynoj sevkuru snēgt sovu redziejumu i īrūsynuojumus par bīdreibys organizātom tradicionaluos kulturys nūmetnem i pasuokumu “Kūkļu dīnys”, kurs pyrmūreiz izskanēja 2001. godā.

29. julī Rēzeknis nūvoda Dekšuoru pogosta “Madžuļūs” bīdreiba svieteis sovu 15. jubileju ar atvārtūs durovu dīnu.

Dīnys parāds:

13–16 – Rodūšuos darbneicys vysai saimei
Keramika – Irēna Greivule
Bārza tuošu darbneica – Astrīda Vucyna
Sīra sīšona – Jolanta Smane
Kūklis spēle, daņči – Māra Vucyna, Tālis Karlsons.

16 stuņdēs – dzīsminīka Vinsenta Kūkoja koncerts i apsveikumi

Byus ari ols i tradicionaluo “Latgaļu sātys” zupa. Varēs nūpierkt keramikys traukus. Sovpus vokorā planavuota vakariešona pi gunkura ar dzīsmem i grūzenim.