Pošā pyrma Juoņadīnys laikā, Kuorsovys piļsātys bibliotekā nūtyka jaunys gruomotys atvieršonys svātki – sovu ūtrū dzejis gruomotu „Dvēseles dienasgrāmata” skaiteituoju viertiejumam nūdeve ari LaKuGys skaiteituojam nu jau pazeistamuo mežvidīte Inta Nagla.

„Pyrma goda guoju pi jiusu ar sovu pyrmū dzejis gruomoteņu „Smilšu pulkstenī iestrēdzis laiks”. Asu cīši laimeiga i pateiceiga sovim skaiteituojim, jo sajiemu daudz lobu vuordu i saprotu, ka munys dzejis ailenis cylvākim ir vajadzeigys, ka tuos rūn atbolsu jiusu sirdīs i es nadreikstu pīraksteitū savteigi paturēt sev – pots Dīvs ir vieliejs, kab muna dzeja „ītu pasaulī”. Itūreiz eimu pi jiusu ar dzilis mīlesteibys i pateiceibys vuordim, kuri pīraksteiti munys „Dvēseles dienasgrāmatā”. Itei gruomota ir veļtejums munim vysu meiluokajim cylvākim – meitom Ausmai i Lāsmai, dālam Arvim, munai muotei i Jurgim, draugim, kuri mani labi pazeist i cieški ir kūpā ar mani. Nu tei ir ari duovona vysim tim breineigajim cylvākim, kurūs asu satykuse škārsteiklā – muna dzeja ir dziļa pateiceiba jim par sapratni, labesteibu i izmundrynuojumu, i es cīņā nūlīcu golvu jūs prīškā.” – tai poša gruomotys autore Inta Nagla.

Gruomotai ir dūts vacuokuos meitys Ausmys draudzenis Alisis izdūmuots nūsaukums. Gruomotys vuoku rūtoj Intys pošys zeimuojums, par kura simboliskū nūzeimi jei soka: „Kotrs cylvāks kai zīds Dīva sorgojūšuos plaukstuos. Tei dvēsele kai pērle izstaroj mīlesteibu, kas saplyust ar Vysuvaranuo duovuotū Gaismu”. Taipat Intys dorbi ir ari gruomotys kruosainojuos ilustracejuos. Vuoka dizainu taisejuse Aija Pastare, grafikys – Inta Terentjeva.

Dzejūli sakuortuoti 6 tematiskajuos sadaļuos, kuruos autore izīt cauri myuža ritiejumam nu bierneibys bezryupeibys da cylvāka brīduma laikam, nu kotram cauri vejuos mīlesteiba vysu skaistuokajā, vysu patīsuokajā tuos tālā: bārna mīlesteiba iz muoti i muotis mīlesteiba iz bārnim, diveju cylvāku sovstorpejī jiutu celi, Dīva mīlesteiba iz myusim i myusu ticeiba i paļuoveiba iz Dīvu, mīlesteiba iz draugim, tyvim cylvākim i pat najaušu myusu dzeivis garumguojieju. Vīna nūdaļa gruomotā ir ari latgaliski – mīlesteiba iz sovu zemi i muotis volūdu, kurā „ryučeits prīceigs vuovuļoj…”.

Iz gruomotys atvieršonys svātkim beja īsaradušs gon Intys klasisbīdri, gon juos dzejis aiļu meiļuotuoji nu vysa nūvoda. Beja ari eipašs gosts – gruomotys izdeviejs Aivars Gulbis nu apguoda „Mana grāmata”, kurs māruojs tuolū ceļu nu Līpuojis. Jis atzyna, ka apguoda ar Intu ir izaveiduojuse cīši veiksmeiga sadarbeiba. Inta Nagla beja vīna nu pyrmajom, kura 2011. goda suokuos atsasauce aicynuojumam jaunajim autorim izdūt sovus dorbus naleluos tiražuos. Tai topa gruomota „Smilšu pulkstenī iestrēdzis laiks”. Intys dzeja ir ari 7. apguoda izdūtajūs kūpkruojumūs. I dreižumā gaidoms vēļ vīns puorsteigums – Aivara, kurs ir ari profesionals fotografs, i Intys kūpeigs projekts – suvenirgruomota „Ziedu valdzinājums” ar kruosainom karteņom i Intys dzeju.

Eipašs paļdis par izjustū dzejis skaitejumu i muziciešonu Andai Šicānei i Kuorsovys Muzykys i muokslys školys absolventem, akordeonistem Jolantai Močai i Janai Dūmiņai.

Viesti sagatavieja Inta Jurča, Kuorsovys piļsātys bibliotekys vadeituoja

Kartenis – nu Intys Naglys privatuo albuma

***

Piec rosys pūdenim

Šudiņ īšu pļovā
Rosys pūdeņus lasiet čajam
Bosom kuojom,
Lai māreitis naiztramdietu
I taurinim spuornus nanūlauztu.

Tu breinīs:
Kaida atškireiba –
Bosom voi apautom īt?
Ir. Ir!
Kod eji zuobokim kuojuos,
Vysu pļovys klusumu pamūdynuosi
I breinums prūjom aizliduos klusi.

Bet es itūreit
Pļovys klusumu
Vālūs satvert ar sirdi
I kūpā ar rosys pūdenim
Zali dzaltanim salaseit,
Lai zīmys vokorūs garūs,
Kod sirds kai dadža pūgaļa kolst,
Byutu maņ breinuma čaja molks,
Kuru dzerūt, mīru i prīcu
Atgiut varu…

***

Luoču nūzīgums
Gondreiž fabula

Kū luoči beja nusazīguš?
– Jī prosta beja nūsazīduš!!!

Vysu zīmu nasamozguoja,
Ka nu ar varu
Jūs veļas automatā
Mozguot daguoja!

I luoči ryuce –
Napatika jim nimoz,
Ka velis automats jūs kratieja,
Bet tūmār labi beidzuos vyss-
Jī sprauni uorā izleida!

Tai muocitēs nu luoču pīmāra
I mozgojitēs čakli,
Lai velis automatā šaļti
Natyktu jius likti!

***

Tei vīneiguo zvaigzne

Sirds pakluoj
Syltus dečus Tev prīškā,
Lai nasoltu kuojis,
Kod īsi ar mani parunuot…

Dvēsele vysziluokuos zvaigznis
Izber pi dabasim tymsim,
Lai Tu radzātu ceļu
I napakristu.

Tikai pruots gryb
Izcelt sātu,
Bet sirds soka citu:
Ka Tu nuoksi tim šaļtī,
Kod maijrūzis zīdēs.

Tev nasaļs ni kuojis,
Ni godu ceļūs pīkusušo sirds,
Juo Tevi pi manis atvess
Tei vīneiguo zvaigzne,
Kas nanūdzīst…