Ar dzīsmi “Aiz stykla” projekts “Vuordi” turpynoj viesteit par īškejuo pasauļa sajiutom
Rokstu sagataveja: portals lakuga.lv
Muzykys projekts “Vuordi”, kas vosorā debitēja ar dzīsmi “Tymsys”, klauseituojim pīduovoj jaunu skaņdorbu “Aiz stykla”. Kai stuosta tuo autors i izpiļdeituojs Edijs Rancāns, sovā eseibā “Aiz stykla” var skaiteit par dzīsmis “Tymsys” turpynuojumu.
“”Aiz stykla” ir dzīsme par trauksmis sajiutom, kod tei aptur vysu, kas ir apleik. Kod laikam vaira nav rūbežu. Kod stresa i vysa puorejuo ir par daudz. Tymā šaļtī ir vīnkuorši juoiztur. Par sajiutom, kod vaira navar saprast, kurys dūmys ir vārts jimt vārā, kurys tik juolaiž garum,” tai Edijs Rancāns.
Projektā “Vuordi” cikom kas dorbojās vīns pats Edijs Rancāns, tok dzīsmis audio apstruodi taisejs Guntars Poplavskis. Dzīsmi “Aiz stykla” var klauseitīs ari Spotify, iTunes i cytuos platformuos.
Muzykys projekta “Vuordi” mierkis ir vaira runuot par emocionalū pasauli, trauksmi, panikys lēkmem i vysu puorejū, par kū cylvāki bīži viņ nagryb runuot i lobpruot gryb nūglobuot, it eipaši reizem nu seve.
