Rokstu sagataveja: portals lakuga.lv

Drupeit vaira nakai pyrma mieneša Izgleiteibys i zynuotnis ministrejis organizātajā konkursā “Latvejis Jaunīšu golvyspiļsāta” par uzvarātuoju kai “Latvejis Jaunīšu golvyspiļsāta 2024” tyka paziņuots Leivuona nūvods i pyrmū reizi konkursa viesturē tuo ceļojūšais kauss nūbrauce iz Latgolu. Itai nedeļai īsacejumus Latgolys pīdzeivuošonai sagatavejuse Leivuona nūvoda multifunkcionaluo jaunīšu iniciativu centra “Kvartāls” vadeituoja Marija Driksna.

Piecpušdīne ar latgalīšu stuostim, spēlem i volūdu

21. septembrī 14.00 stuņdēs kotru grybātuoju aicynojam braukt gostūs iz Leivuonu, jaunīšu centru “Kvartāls”, lai izzynuotu vaira par tū, kai Latgolys puiši – Lauris Zalāns i Kristaps Rasims – ir sevi motiviejuši i struoduojuši, kab jūs vuords i dorbi izskanātu ari aiz Latgolys rūbežu. Sasatikšona ar Lauri i Kristapu, skaista muzyka, latgaliskys spēlis, aktivitatis, kuruos varēs izzynuot vaira par latgalīšu volūdys vuiceišonūs, i vēļ daudzi kas cyts – par tū vysu byusim pasaryupiejuši!

Rudiņam īplānuot teatri

Itūnedeļ īsoku apsavērt beletus i rudiņam īplānuot kaidu teatra izruodi. Par pīmāru, 15. oktobrī iz vītys Daugovpiļs teatrī, bet piec tam 21. i 22. oktobrī, kod teatris gasteis Reigā, Dailis teatrī, var nūsavērt izruodi “Divejis vyrtuvē, naskaitūt nabašnīku”. Tys ir stuosts par divejom sīvītem, kam dzeivē nav vyss bejs vīgli, bet juos ir speiteigys i gotovys puorvarēt vysaidus škieršļus, lai byutu leimeigys – i atsabreivuot nu nabašnīka. Izruode, kura suokumā ir pīpiļdeita ar latgalīšu humoru i pa mozeišam puorīt iz kriminalū dramu. Vaira par izruodi var izzynuot ari Kitijis Balcaris recenzejā ITE.

800 metru rudineigys pastaigys

Kruoslovys nūvoda Ondrupinē ir skaista, 800 metru gara Ondrupinis pūra styga, kurā itymā laikā var baudeit rudineigu pastaigu. Pūrā var na viņ nūraut kaidu bryuklini i izlikt iz zūba, tok ari viertīs putynus, vysaidus augus i baudeit svaigū, dzierkstūšū Latgolys gaisu. Sūpluok stygys atsarūn ari Ondrupinis lauku sāta (tys daīmams nūsaceitūs laikūs i piec īprīškeja pīroksta, vaira par muzeju var izzynuot portala lakuga.lv muzeju kruojumu duorgumu serejis stuostā ITE). Itū skaistū vītu īsoku napalaist garumu rudineigim breivdīnu izbraucīnim Latgolā!