Rokstu sagataveja: portals lakuga.lv

Pyrma puora nedeļu Latvejis Etnografiskajā breivdobys muzejā Reigā nūtyka pasuokums-tiergs “Latgalīši Reigā brauc!”. Sastdiņ, 21. oktobrī, plānuots nūtikšonu atkuortuot, itūreiz sasateikūt Āgenskolna tiergā, viestej Latgolys plānuošonys regions, kurs itū nūtikšonu organizej sadarbeibā ar bīdreibu “Latgales tematiskie ciemi”.

Sevkurs interesents 21. oktobrī teik gaideits Āgenskolna tiergā nu 10 da 17 stuņžu, tī byus latgalīšu tiergs, ļusteiga atmosfera i vysaiduoki lauku lobumi.

Pasuokums byus saistūšs ari saimem ar bārnim, byus vareiba sasatikt i rodūši dorbuotīs kūpā ar Latgolys amatnīkim – pūdnīkim Olgu i Valdi Paulinim, keramiki Raivo Andresonu, peit skalinis kūpā ar kūrpinīka omota meistaru Andri Kačkānu, cikom kūka spēlis i cytus kūkamatnīceibys dorbus pīduovuos Juoņs Spuriņš, sovpus stykla dekorus i mozu stykla vitražu izgataveišonu vuiceis muokslineica Elvira Škutāne.

Vysys dīnys garumā byus latgalīšu muzyka i rudiņa zaļumballe ar kapelu “Augusti”, “Līvenhofas muzikantim” i muzykalū Kolesničenko saimi. Pasuokuma ļustis vadeis šarmantais latgalīts Oskars Bērziņš. Taipoš teik plānuoti konkursi ar bolvom nu Latgolys amatnīkim, latgalīšu volūdys dreizī kursi, sasadzīduošona i sirsneigys sarunys.

Ar gordom putrom i cytim lobumim nu zemnīku saimisteibys “Kuotini” cīnēs “Latgolys golds” ar špeka veiru Andri prīškgolā. Taipoš byus vareiba nūgaršuot ari “Mūsu pankūkas”.

Kai stuosta bīdreibys “Latgales tematiskie ciemi” puorstuove Zane Pranevska, sauklis “Latgalīši Reigā brauc” ir tradicionals jau vairuoku godu garumā, idejis iniciators ir Latgolys plānuošonys regions, kurs jau nu suokta gola aicynuojs tolkā ari “Latgales tematiskos ciemus”. Pasuokuma mierkis ir ari reidzinīkim nūdūt Latgolys vīsmīleiguma sajiutu, kai ari īprīcynuot ar kvalitativim izstruoduojumim i gordumim nu Latgolys. “Raudzeju skaiteit – ka atjimt nūstyn pandemejis godus, itys saīt laikam jau dasmytais gods, kod taids pasuokums teik organizāts. Nu suoku itys pasuokums nūtyka Reigys piļsātys svātku laikā, tok piec pandemejis īvīstajom korekcejom, pasuokums palics par pastuoveigu nūtikšonu. Braucit poši, aicynojit cytus iz myusu jautrū i vīsmīleigū pasuokumu,” aicynoj Zane Pranevska.

Foto galereja: Reklamys agentura “Bulterjers”.