Rokstu sagataveja: portals lakuga.lv

Latvejis Nacionalajā namaterialuo kulturys montuojuma (NKM) sarokstā itūšaļt ir īkļautys sešys kulturtelpys. Vīneiguo kulturtelpa Latgolā – Upītis kulturtelpa – itūgod svieteis pīcgadi nu dalikšonys vydā sarokstā i deļtuo catūrtū reizi aicynoj iz kulturtelpys dareituoju i atbaļsteituoju gūdynuošonys svātkim “Gūdi”. Svātki byus 2. decembrī 19.00 stuņdēs itūgod piec renovacejis atkluotajā Namaterialuos kulturys montuojuma centrā “Upīte” Bolvu nūvodā.

Pyrmū reizi namaterialuos kulturys montuojuma svātki “Gūdi” nūtyka 2019. godā, atzeimojūt pyrmuo gods jubileju nu Upītis kulturtelpys īkļaušonys NKM sarokstā. “Gūdi” ir nūtikšona, kurā teik paļdeits Upītis kulturtelpys kūpiejim, popularizātuojim, atbaļsteituojim i leidzjutiejim, kas paleidz padareit boguotuoku i atteisteit kulturtelpu, kai ari veicynuot tuos atpazeistameibu. Itūgod pateiceibys pasuokums byus catūrtū reizi. Tymā tiks svieteita ari pošys kulturtelpys pīcgade.

“Gūdi” vysod ir jaunu sadarbeibys projektu pīpiļdeita nūtikšona. Pyrmajā godā folklorys kūpa “Upīte” sasadorbuoja ar orkestri, ūtrajā godā ar džeza muzikim, trešajā – kūklātuojim, bet itūgod gaidoma sadarbeiba elektroniskajā muzykā ar dzīduotuoju i komponisti Eviju Vēberi. Taipat pasuokumā paradzāta grupys “Unknown Artist” i projekta “Naktenīks i Reiti” uzastuošona. “Gūdus” vadeis grupys “Unknown Artist” daleibnīks Arnis Bukšs, bet piec svineiguos dalis plānuota balle ar grupu “Dabasu Durovys”. Kas gods “Gūdim” teik izalaseits ari tematiskais motivs, kurs itamā reizē byus “mama”.

Vēļ da 20. novembra kotrys var dasaceit pretendentus ituo gods gūdynuošonai namaterialuos kulturys montuojuma svātkūs “Gūdi” kaidā nu reikuotuoju pīduovuotūs ostoņu nominaceju. Taipat interesenti var pīduovuot ari sovu nominacejis variantu. Pretendentu dasaceišonys anketu var aizpiļdeit ITE.

Bolvu nūvoda Namaterialuos kulturys montuojuma centra “Upīte” direktors Andris Slišāns soka, ka ir na viņ svareigi aktivi dareit kūpīnys atteisteibys i izaugsmis sferā, tok ari jēgt pasaceit paļdis kotram aktivajam cylvākam, kurs īsasaista kulturtelpys darbeibā i tuos atbolstā. Poša Andra stuostu par tū, kai itymūs godūs Upītis kulturtelpai ir guojs i kaidus padūmus varātu dūt, aicynojūt namaterialuos kulturys montuojuma sarokstam pīsateikt cytus grybātuojus Latgolā, varēs dzierdēt 23. novembrī Preiļūs paradzātajā seminaru cykla “SPĀKA LAB” pasuokumā.

Latvejis Nacionaluo kulturys centra direktore Signe Pujāte soka: “Upītis kulturtelpā dzeivoj darbeigi, optimisma pylni i mierktīceigi ļauds, kas izcyluo nūvodnīka Ontona Slišāna piecteču vadeibā ļaun kulturtelpai atsateisteit, uzplaukt i palikt par paraugu kai Latvejā, tai aiz tuos rūbežu. Mums ir kū vuiceitīs nu aktivuos kūpīnys i mums tei juoatbolsta raudzeišonā turēt dzeivi i nūdūt tuoļuok sovu montuojumu.”

Lai pīsadaleitu namaterialuos kulturys montuojuma svātkūs “Gūdi”, kotrys interesents aicynuots pīsasaceit da 30. novembra. Kungi aicynuoti apsaviļkt ancukūs, bet damys vokora suknēs. Paļdeišonys pasuokuma daļa ir bezmoksys, bet īīšonys moksa ballē byus 5,00 €. “Gūdus” reikoj Namaterialuos kulturys montuojuma centrs “Upīte”, bet nūtikšonu pabolsta Latvejis Nacionalais kulturys centrs i Latvejis Republikys Kulturys ministreja.