Rokstu sagataveja: portals lakuga.lv

Itei nedeļa Latvejis kulturys dzeivē paīt festivala “Prozas lasījumi” zeimē. Tuo daudzveideigūs nūtikšonu vydā ari latgaliskī pasuokumi Reigā i Rēzeknē (par tim vaira var skaiteit ITE). Vīna nu konkursa “Latgolys prozys skaitejumi 2023” lobuokūs dorbu autorem ir ari Ilze Aizsila, kura pa dzimšonai ir nu Kruoslovys pusis. Tys ari īmeslis, deļkuo juos īsacejumi saisteiti kai ar kulturviesturiskim objektim Škaunē i Ezernīku pogostā, tai “Prozu i karbonadem” Rēzeknē i tīšraidē.

Landskoronys Vyssvātuos Treisvīneibys Romys katuoļu bazneica Škaunē

Snīga kuorta aiz lūga atguodynoj, ka daguojs laiks nūmīrynuot pruotu i padareit lānuoku kasdīnys sūli. Juosaļaun boltom dūmom i juopasasoka par godu, kura goli simboliski sasavīnoj adventa gradzynā. Nu bierneibys asu vuicejusēs pasasaceit. Paļdis bazneicai, kurā asu remdiejuse bādys i svietejuse sovys dzeivis eipašuokuos šaļts. Tei ir vīna nu skaistuokūs Latgolā – Landskoronys bazneica. Tei atsarūn pīrūbežā, aiz bazneicys valis var redzēt Boltkrīveju. Ākys īškpuse ir puosokaina – akmiņa greida, maiga pasteļtūņa sīnys, kolonys ar gleznuojumim i oranžbryunim, eistyn kai zeļteitim, ornamentim, boltuo Lurdys Dīva muotis figura, kruosaina stykla mozaikgleznenis lūgūs, eņgeļu figurenis viers treju oltoru, kruošnis lustrys, kurūs trauslajuos laseitēs spielejās saulis spaiti, i zeimeigys svātbiļdis, kas atguodynoj par dzeivis vierteibom. Bazneica ir lela, ar augstim grīstim i tai pīstuov vāsums, tī dūdūtīs, ir juoapsavalk syltai. Vēļ ceļuotuojim juojem vārā, ka objekts atsarūn pīrūbeža zonā, vajadzeiga pase i caurlaide, kū izsnādz Vaļsts rūbežsardze.

Jaundūmis muiža Rāznys Nacionalajā parkā

Muna sasatikšona ar Jaundūmis muižu Ezernīku pogostā saistuos ar munu prīškguojieju snāgumu ituos vītys nūzeimeiguma izceļšonā i atteisteišonā. Niu restaurātā akmiņa sīnu kliets kuormā ir sataiseits Jaundūmis muižys vidis izgleiteibys centrs i ekspozicejis zāle. Plašuo pogolma celeni aizvad iz muorku ar saleņu, iz kuruos atsarūn lapine. Senejuo, itūšaļt naīdzeivynuotuo muižys kuorma ūtrā pusē suocās izzynūša pastaigu styga. Kūka laipa vad pa pūrainū mežu da Ješa azara (Latvejā solom boguotuokais azars, dobys līgums) krostam, stuostūt par dobys daudzveideibu ar gida voi informacejis stendu paleidzeibu. Maņ beja lels gūds sasazynuot ar ituos muižys nazkodejūs eipašnīku piecteci Arnulfa fon Keislera kungu, kurs laipni nūdeve informaceju par Keisleru dzymtys viesturi, ašņa saikni ar kaidu vuocu grafu, dzymtys simboliku, ar kū niu apmaklātuoji var īpasazeit vidis izgleiteibys centrā. Taipat, īprīšk pasyutūt, te var baudeit gordu, gunkurā vuoreitu zyvu zupu, apsavērt aktualuos izstuodis i rezervēt zāli privatim pasuokumim. Atkluošu nūslāpumu – itei muiža mani īdvasmuojuse romana pīraksteišonai, par kura izīšonu informaceja sekuos cytugod.         

“Proza i karbonadis” – jaukam vokora nūslāgumam latgaliskuos nūskaņuos

Šaļtim gribīs vīnkuorši palikt sātā, īdegt adventa sveceiti i sasasiļdeit, dzerūt vosorā kaļteitu zuoļu čaju. Tok tys nalīdz baudeit kulturys nūtikšonys, na tai? Itūnedeļ nūteik Storptautyskais prozys festivals “Prozas lasījumi”. Vysaidys aktivitatis eistynoj ari regionūs. 7. decembrī 19.00 stuņdēs kluotīnē “IGGI bārs & karbonādes” (Rēzeknē, Atbreivuošonys alejā 95C) nūtiks konkursa “Latgolys prozys skaitejumi 2023” nūslāguma pasuokums, kurā varēs dzierdēt vairuoku autoru dorbus, ari naizīmūt nu sātys! Tīšraide byus nūsaverama latgalīšu kulturys ziņu portalā lakuga.lv. Skaitejumūs pīsadaleis ituo gods literarajā konkursā ar devizi “Es raksteišu, bet voi tu skaiteisi?” vysaugšuok nūvārtātūs dorbu autori – Vita Briška, Dāvids Rubens, Ilze Sperga, Sarmīte Trūpa i Ilze Aizsila –, muzicēs grupa “Gandreiž 10nīkā”; pasuokumu vadeis Kārlis Taranda.