Nacionalajā bibliotekā kruojuma izlasē apsaverami izdavumi latgaliski i lībiski
Rokstu sagataveja: portals lakuga.lv
Da 10. februara Latvejis Nacionaluos bibliotekys (LNB) Kruotivis izsnēgšonys punktā (3. stuovā) apsaverama kruojuma izlase “Izdevumi latgaliešu un lībiešu valodās”, kurā izvītuotys latgalīšu i lībīšu volūdā izdūtuos ābecis, dzejis i daiļliteraturys gruomotys, kai ari Latvejis Republikys Satversmis izdavumi.
LNB Golvonuos kruotivis centra kruojuma vadeituoja Ilze Rozentāle stuosta stuosta, ka kruojuma izlase “Izdevumi latgaliešu un lībiešu valodās” sagataveita, kab skaiteituojim prezentātu Latvejis Nacionaluos bibliotekys Golvonuos kruotivis centra kruojuma daudzveideibu. Itei izlase turpynoj nu 2023. gods septembra da decembra eksponātū tematiskū kruojuma izlasi “Izdevumi latviešu valodas pareizrakstībā”, īpazeistynojūt ar izdavumim latgalīšu i lībīšu volūdā, kai ari snādzūt īskotu latvīšu viesturiskūs zemu kulturviesturiskuo montuojuma vīnā nu aspektu – gruomatnīceibā.
Izdavumi kruojuma izlasei atlaseiti, par pamatu izmontojūt informaceju Nacionaluos enciklopedejis škierklī “Latgaliešu literatūra” i Lībīšu kulturys i volūdys portalā. Izalaseišona nūtykuse atbylstūši informacejis olūtūs mynātajam i izviertejūt tūs daīmameibu Golvonuos kruotivis centra kruojumā, izdavumu fiziskū stuovūkli i nūdrūsynojūt saturiskū daudzveideibu (ābecis, gruomotys bārnim, dzeja, daiļliteraturys izdavumi i cyti).
Kruojuma izlasi var apsavērt Latvejis Nacionaluos bibliotekys dorba laikā.
