Rokstu sagataveja: portals lakuga.lv

Itamā latgaliskuo raidīroksta “Pīci breinumi” sezonā komandai dasavīnuoja diveji jaunīši – Adrians Zelčs i Arnis Malakovs. Obeji ir Austrumlatvejis Tehnologeju vydsškolys školāni i tū, kai jim īt, vari izzynuot “Pīci breinumi” TikTok kontā voi Instagram, kai ari klausūtīs raidīrokstu “Pīci breinumi”. Itūreiz īsacejumus sagataveja Adrians, i jis īsoka nūtikšonys Daugovpilī, Rēzeknē i Leivuonā.

Izzynoj viesturi

Caturtdīņ, 1. februarī, 18.30 Tradiceju sātā, Daugovpilī, byus vareiba pasavērt, kas 19. godu symtā atsaroda eistā Vydslatgolys jaunivis pyura skreinē. Kūpā varēs izzynuot seņču tradicejis i gaumi, kai ari sadzīduot ar folklorys kūpu “Svātra”.

Apbreinoj dobu

Da 31. janvara Rēzeknis Centralajā bibliotekā var īspēt apsavērt fotografa i kinooperatora Aloiza Savicka foto izstuodi “Mirkļa pieskāriens”. Aloizs radz skaistumu kotrā šaļtī, sevkurā dorbā, kusteibā i cylvākā. 

Svietej svātkus

Trešdiņ, 31. janvarī, Leivuonā nūtiks MJIC “Kvartāls” 10 godu jubilejis koncerts. Jaunuotnis iniciativu centrā jius sagaideis jaunīšu prīšknasumi, pīredzis stosti, vysaidys aktivitatis, kai arī dzierīni i aizkūdys. Leivuons vysa goda garumā puorsteigs jaunīšus ar vysaidom nūtikšonom, jo itymā godā tei ir jaunīšu golvyspiļsāta, sekoj leidza i apmeklej!