Rokstu sagataveja: portals lakuga.lv

Kulturys īsacejumus itūreiz pīduovoj Daugovpiļs teatra aktrise Agnese Laicāne. Itūnedeļ ir daudz vareibu redzēt ari jū pošu iz skotivis – jau reit, 20. februarī, skateituoji Daugovpilī teik gaideiti iz latgaliskū izruodi bārnim “Spreideits”, sovpus nu pīktdīnis da svātdīnis gaidoms īstudiejuma “Pie klusiem ūdeņiem” maratons – kotru dīnu pa izruodei. Tok Agnese aicynoj teatri baudeit ari juos dzymtajā pusē Bolvūs, izmontuot vareibu nūsavērt pārnejuo gods lobuokū kinu i cikom pavasars nav daguojs dobā, raudzeit radeit tū pošim.

Pyrmizruode Bolvu Tautys teatrī

Ka ari pošai nasaīt aizbraukt, raugu sekuot leidza tam, kas nūteik munā dzymtajā piļsātā. Prīcojūs, ka Bolvu Tautys teatris piec ilguoka laika pīduovuos jaunu pyrmizruodi – “Kaķīša dzirnavas” piec Kārļa Skalbis puorsokys motivu.

“Pastkarte no Romas”

Ar napacīteibu gaidu 21. februari, kod beidzūt redziešu kinu “Pastkarte no Romas”. Cīši lela prīca, ka ir vareiba nūsavērt kinys ite, Daugovpilī, Vīneibys nomā, i nav obligati juobrauc iz Reigu, ka ir gribiešona redzēt kolegus iz leluo ekrana.

Pošim meklēt kruosys

Pādejā laikā naspieju i naspieju sagaideit pavasari. Tai kai sātā ir kačs, eisti navaru pierkt daudzi vysaidu puču, kas izkruosuotu kasdīnu. Partū, cikom vēļ uorā vokorūs ir tymss i dīzgon solts, asu suokuse likt Lego pučis, kas ari paleidz, ka ir bejuse gryuta dīna. Tys īsacejums byutu – pošim meklēt kruosys apleicejā vidē voi sataiseit koč kū kruosainu pošim sev, kab byutu vīgļuok sagaideit pavasari.