Rokstu sagataveja: portals lakuga.lv

Ar sovim īdviesmis īsacejumim itūreiz doluos puorlīcynūšys runys trenere i koučs, izgleitojūšu i darejumu pasuokumu reikuotuoja, īdvasmuotuoja, uzjāmuma “Komunikācijas dizaina studija” radeituoja i vadeituoja Iveta Graudiņa.

Byut par sevi puorlīcynuotam

Nedeļa sūluos byut cīši intensiva – muns plāns savilkt astis aba atskaitis jau pabeigtim projektim, īsuokt jaunus projektus sovā uzjāmumā – puorlīcynuošys runys pīcu nedeļu kurss “UZRUNĀ” startej jau itūnedeļ, paplanavuot iz prīšku (jauns mienesnīks, eistais laiks likt pamatus jaunim īsuocīnim). Taidā režimā muns personeigais izaicynuojums ir atrast i veļteit laiku atpyutai i atslūdzei.

Itamā nedeļā apmekliešu koncertizvadumu “Gorā”, kas veļteits dzejneicys Bronislavys Martuževys atcerei. Īpazynu juos dzeivis stuostu 1990. godūs, kod muna mameņa Anita Graudiņa Rēzeknis Tautys teatrī spēlēja dzejis monoizruodi “Krystaceļš”, nu tuo laika sekojam leidza, kai atdzymst juos dzeja jaunuos skaņuos – myuslaiku komponistu muzykā.

Puorguojīnī pa Bieržgali

Sastdiņ grybu beidzūt pīsavīnuot kūpīnys “Nazynamuo Rēzekne” pasuokumam (ITE pasuokums) – itū reizi tys byus puorguojīņs pa Bieržgali – nu centra caur Bieržgaļa muižu i parku leidz O. Rupaiņa atdusys vītai i muzejam. Apbreinoju ituos entuziastu grupys ceņtīnus apvīnuot cylvākus ar leidzeigom interesem un radeit pasuokumu, nūtikšonu, gruomotu škapa veiduošonu voi putynu būreišu darynuošonu nu mozumeņa, poši sovim spākim, nagaidūt fondus, projektus, eipašu atbolstu. Spāks ir vīnuotīs un dareit pošim.

Gasteit Lūznovys muižys parkā

Vēļ nūteikti atrašu laiku, kab aizbraukt leidz Lūznovys muižys parkam, kur nūteikti jau zīd zylī vyzbuli, bet muižā ir apsaverama Evijis Styrnys akvareļu izstuode “Sapņojums”. Divu pazeistamu gleznuotuoju Elgys Paurys i Vladislava Paura talanteiguo atlase, struodojūt par juristi, atrūn laiku rodūšumam un mekliejumim gleznīceibā.