Rokstu sagataveja: portals lakuga.lv

Kulturys īsacejumus itai nedeļai sagatavejuse jaunīte nu Rēzeknis nūvoda Rogovkys – Amanda Ludbuorža. Kasdīnā jei vuicuos Rēzeknis Vaļsts 1. gimnazejā, tok sastdiņ, 29. junī, Rogovkys veikalā “Sils” tiks atkluota Amandys ar latgalīšu kulturys kusteibys “Volūda” paleigu taiseituo ekspoziceja “Iz krūdzeņu gluds bej’ ceļš”. Apmeklēt Pīterdīnys nūtikšonys Nautrānu pogostā jei aicynoj ari portala lakuga.lv skaiteituojus, taipat ari nadamierst par Sātys kopejneicu dīnom Rēzeknis i Ludzys pusē i baudeit Latgolys muokslu.

Pīterdīna Rogovkā

Ir svareigi naizmierst i saglobuot vītejuos apleicīnis viesturi. 29. junī Rogovkā nūtiks Pīterdīnys svieteišona. Itūgod pasuokums suoksīs ar ekspozicejis “Iz krūdzeņu gluds bej’ ceļš” atkluošonu veikalā “Sils” 17.00 stuņdēs, kas viesteis par Zaļmuižys muižinīka caltūs krūgu viesturi. Pīterdīnā byus ari pīminis šaļts pi Pītera Jurciņa kopa Desetnīku kopsātā, kas 29. junī byus 18.00 stuņdēs. I 19.00 suoksīs amaterteatra “Bykovīši” izruode – Hermaņa Paukša luga “Ar spani pa golvu” – i Pītera Jurciņa pīmiņai reikuotuo literatu konkursa nūslāgums.

Sātys kopejneicu dīnys

29.-30. junī Vydslatgolā nūteik Sātys kopejneicu dīnys. Itei ir unikala vareiba īpazeit Latgolys kulturys daudzveideibu i baudeit jaunys garšys. Izgaršoj Ludzys i Rēzeknis sātu lobumus – zivs, lauku tortus, blīnus, asuškys, sīru, buļbis i daudz kū cytu.

Latgolys muokslinīku pasauļs

Nūsagloboj nu korstuma skaistajā Rēzeknis Muokslys nomā. 19. godu symtā caltuo āka ir boguoteigai rūtuota ar kūkgrīzumim i aizvess jius dažaidu Latgolys muokslinīku pasaulī.