Rokstu sagataveja: portals lakuga.lv

10. augustā vīns nu Latvejā vacuokūs etnografiskūs ansambļu “Rikava” Rykovys kulturys nomā svieteis sovu 70 godu jubileju. Paradzāta jaunys izstuodis atkluošona, izvadums “Ustobys īdancynuošona” i svātku torts ar kūpeigu vakariešonu.

Kai stuosta etnografiskuo ansambļa “Rikava” vadeituoja Aija Dundure, Latvejā ir ari vacuoki ansambli, tok, piec Latvejis Nacionaluo kulturys centra datim, vairumam nu tūs darbeibys laiks ir ar puortraukumim, sovpus ansamblis “Rikava” dorbojās bez puortraukumu, deļtam stabili ir vīns nu vacuokūs kolektivu vaļstī. Itūšaļt tymā dorbojās 18 cylvāki, vacuokajam dalinīkam ir 80 godu, sovpus jaunuokajam – vīns gods. Kai smaidūot stuosta Aija, jaunuokais pa skotivi drogoj tai, ka i dadzeit navar!

10. augustā rykovīši aicynoj gostūs iz Rykovys kulturys nomu, kur nu 13.00 stuņdem paradzāta 70 godu jubilejis svieteišona ar jaunys izstuodis atkluošona, izvadumu “Ustobys īdancynuošona” i svātku tortu ar kūpeigu vakariešonu.

Kai stuosta ansambļa vadeituoja Aija Dundure, foto izstuode radeita ar Rēzeknis nūvoda pošvaļdeibys atbolstu, tuos ir lelformata fotografejis, kas atlaseitys nu pošu arhivim i piec atkluošonys byus apsaveramys Rykovys kulturys nomā. Foto izstuodis vadmotivs ir “Mogonu kolns – nu saulis da saulei”. Kai stuosta Aija, “Mogonu kolns” ir sātys nūsaukums, kur reiz dzeivuoja kolektiva dalinīki, muosa ar bruoli Ontons i Brone Pluoti, i tū var skaiteit par ansambļa šyupeļa vītu. Lelformata foto izstuodē varēs apsavērt zemnīka dorba rytu nu saulis da saulei, byus radzami ari vairuoki zemnīku prīkšmati, kas seņuok izmontuoti dorbūs.

Sovpus izvadumā “Ustobys īdancynuošona” byus jaunī saiminīki – Ignats i Veronika, kuri nupat izcāluši jaunu ustobu i aicynoj sābrus gostūs iz “suoļa maizi”, tiks apsprīsti vysaiduoki jaunumi, veiru i sīvu dorbi. Sevkurs interesents 10. augustā ir aicynuots gostūs iz Rykovu!