Rokstu sagataveja: portals lakuga.lv

Jaunu dzīsmi “Malu jiurā” pīduovoj dzīduotuoja Amanda Lapa, informej juos puorstuove Līva Cimmermane. Singlys veļteits sevkuram, kurs cīts nu vardarbeibys, i pīpiļdeits ar muzikis emocejom, aicynojūt pasauli puorsameit – byut gūdeigim, ciļvieceigim i saticeigim. Dzīsmei radeits ari videoklips, kas paspylgtynoj tuos viestejumu.

Itei dzīsme ir veļteita vysim, kuri cītuši nu vardarbeibys. Muzike nūruoda, ka, tai kai puorsvorā teik runuots par vardarbeibu pret sīvītem, jei itūreiz viestej par ūtru pusi – vardarbeibu pret veirīšim – i par emocionalu, i fizisku, kam veirīši asūt tī, kuri puorsvorā klusej, partū rūnūtīs sajiuta, ka sīvītis var saceit i dareit vysu i jom tyc, pat nanūskaidrojūt apstuokļus.

“Mes naasam cylvāki, ka gribim vīns ūtru apvainuot, nūmalnuot, izsmīt i pazamuot. Svareigi byut ciļvieceigim, pīdūt, spēt puorkuopt aizvainuojumam, izrunuot lītys, na rysynuot problemys i aizvainuojumus publiski. Dorūt nagativū, vysa ciļvieceiba izkiup, īškā cylvākā rūnās malns caurums. Ir skumeigai vērtīs, kai aizvainuojuma deļ cylvāks nazyna, kur liktīs, kai izapaust i atsarībt, tai škārsteikla vidē reikojūt vysaida veida “nūmalnojūšys akcejis”, kas, bolstūtīs iz ituos šaļts aktualajom temom pasaulī, cīši labi struodoj, īsaistūt ari sabīdreibu. Itys cylvāks, kurs tū radejs, daboj sev nagativu baudu nu tuo, ka ūtrys cīš. Mums juoīsavuica runuot vīnam ar ūtru i rysynuot konfliktus ciļvieceigūs veidūs. Ka spēsim vīns ūtram pīdūt, ari poši jussimēs atvīgluoti,” skaidroj Amanda.

Singlam radeits ari videoklips, kurā paspylgtynuoti dzīsmis vuordi. “Te vizualizāts, kai mali aptyn cylvāku, kai cylvāks ībrīn ļaunumā, teik īpeits tymā kai čyusku slozdā. Beiguos attāluots myglys muokuļs, kas simbolizej malus, i cylvāks ar čyuskom kūpā ir sateits vīnā lelā komulī. Vysod juoatguodoj, ka, dorūt ļaunu, tu nadori ļaunu tik cytim, bet ari pats sev, esi īpeits leidza nagativajā vidē. Lai cylvāks nasabreinoj, ka jam puoruok dreiži, pīmāram, nūsiermoj moti, ka jis ir ar malnu caurumu dvēselē,” stuosta Amanda. Videoklipa idejis autore ir poša Amanda, operators – Ivars Utināns, pīsadola Amandys deju kolegis nu SDA “Laima”.

Dzīsmis autore ir Amanda Lapa-Slobožanina. Īrokstā pīsadalejs ari trompetists Ojārs Tūmiņš. Dzīsmis piecapstruodi taisejs Armands Treilihs.