Rokstu sagataveja: portals lakuga.lv

Latgalīšu kulturys kusteiba “Volūda” izdavuse dzejneicys Anitys Mileikys ūtrū dzejis kruojumu “ziņas par gadalaikiem”. Kai informej izdevieji, kruojumā publicāti 42 Anitys jaunuokī dzejis dorbi latvīšu literarajā i latgalīšu rokstu volūdā.

“ziņas par gadalaikiem” ir ūtrais Kruoslovys nūvoda Osyunā dzymušuos literatis Anitys Mileikys dzejis kruojums. 2015. godā “Volūda” (tūlaik vēļ kai “Latgolys Studentu centrs”) izdeve Anitys debeja dzejis kruojumu “mūžīgā nepārtikusī stirna”, kas tyka nomināts Latvejis Literaturys goda balvai (LaLiGaBa) kai vīns nu lobuokūs debejis dorbu literaturā, taipat kruojums sajēme Latgalīšu kulturys goda bolvu “Boņuks 2015” par lobuokū snāgumu literaturā.

Piec pyrmuo dzejis kruojuma izīšonys Anitys dzeja tyka raksturuota kai duala (divejis volūdys kai izasaceišonys leidzeklis), trausla i brutala, namīra, kas pīdzimst kai ba nu mīra, nu nikuo, i mīra, kas pīdzimst nu namīra, pīpiļdeita. Uzrunojūša ar liriskuos varūnis seksualitati, puordzeivuojumim i sīviškeibu, bet reizē autore spiej myužam senejuos temys napīsvaideit ar klišejom i sentimentu (izvylkumi nu literaturzynuotneicys Sandrys Ratniecis, dzejnīka Aivara Eipura i filozofa i publicista Ilmāra Šlāpina viertejumu).

Jaunajā, niu jau ūtrajā, dzejis kruojumā publicāti Anitys Mileikys dzejūli latvīšu literarajā i latgalīšu rokstu volūdā. Kruojuma redaktors ir Oskars Orlovs (Raibīs), bet korektore Māra Mortuzāne-Muravska. Dzejis kruojuma vuoka ilustraceja ir tūpūšuos muokslineicys, Latvejis Muokslys akademejis studentis Lijis Stivrinis speciali radeits dorbs, bet dzejis gruomotys maketu taisejuse dizainere Liāna Merņaka-Nikitina. Kruojuma izdūšonu atbaļstejuši Vaļsts kulturkapitala fonds i Ventspiļs Storptautyskuo Rakstnīku i tulkuotuoju sāta.

Kruojuma redaktors Raibīs, raksturojūt jaunū izdavumu, soka: “Kai īprīškejā kruojumā, tai i itymā dzejūli raksteiti latvīšu literarajā volūdā i latgalīšu rokstu volūdā. Itūreiz jī nasadola autoris pasauļa redziejumu iz pusem, bet kotrys dzejūļs papyldynoj ūtru. Taidā veidā mes varim sekuot leidza kruojuma sīviškuos poetikys nūmaiņai nu zīmys soltuma da vosorys syltuma. I atpakaļ.”

Latgalīšu kulturys kusteibys “Volūda” projektu vadeituoja i kustynuotuoja Kristīne Pokratniece, kura beja Anitys Mileikys pyrmuo dzejis kruojuma projekta vadeituoja i kuru literats Valentins Lukaševičs nūsaucs par Anitys dzejis krystamuoti, par jaunū kruojumu soka: “Anitys dzeja uzrunoj ar dobys tyvumu tamā, ar formu. Patīseibā, kod skaitu juos tekstus, maņ ir sajiuta, ka jei dzeivoj koč kur pi jiurys, vokorūs izīt sapeipātu iz balkona i vāroj “septembra marmelada sauli”, glīmiežvuokus i dzeivoj ikdīnišku, bet tymā pošā laikā sīvītis dziļu dzeivi. I vēļ ilgys. Skaiteju jaunuokū kruojumu i redzieju tī lelys ilgys.”

Īsavērt Anitys Mileikys jaunajā dzejis kruojumā pīduovoj ari augusta/septembra literaturys, publicistikys i viesturis žurnals “Domuzīme”, bet satikt i dzierdēt pošu autori varēs 7. septembrī 11.00 muzykalajuos dzejis reitiškuos “Gulguošona” Rēzeknis nūvoda Pleikšņūs, kai ari 11. septembrī 19.00 literaturys vokoru serejā “DIVI” Reigā, bārā i vintage apgierbu veikalā “Northern Grip”, kur nūtikšonā pīsadaleis Anita Mileika i literats, literaturzynuotnīks Valentins Lukaševičs.

Dzejis kruojums daīmams latgalīšu kulturys kusteibys “Volūda” atbolsta platformā-veikalā voluda.lv, kai ari Latvejis gruomatneicuos nu septembra vyds. Daļa kruojuma tiražys nūdūta Latvejis Nacionalajā bibliotekā, lai jis byutu daīmams piec īspiejis vaira bibliotekuos regionūs.