Rokstu sagataveja: portals lakuga.lv

Niu jau aizritējuse pyrmuo septembra nedeļa, kas nūzeimoj, ka školāni suoc īsajust jaunuo vuiceibu goda ritmā. Ar ituos nedelis īsacejumim pasadola aktiva i cīši gudra 9. klasis škoļneica Elīza Pužule nu Bolvu nūvoda Žeiguru cīma. Jei naatsoka nivīnai aktivitatei sabīdryskajā dzeivē, ir pīsadalejuse televizejis spēlē “Gudrs, vēl gudrāks”. Ari niu Elīza fiļmejās TV šovā, kuru cikom kas navar atkluot, taipoš ir suokuse vuiceibys jaunā školā – Viļakys vydsškolā. Deļtuo ari īsacejumūs itūreiz vaira par Viļaku.

Dvēseliskais mīrs

Sevkurs latgalīts, kasdīnys steigā skrīnūt, var aizmierst par sovu dvēseliskū i goreigū mīru, deļtuo vysim īsoku apmeklēt Zīmeļlatgolys pērli – Viļakys Vyssvātuos Jezus Sirds Romys katuoļu bazneicu, kurā varēsit baudeit na viņ breineigū atmosferu i dvēseliskū mīru, tok ari satikt pošu modernuokū goreidznīku Guntaru Skutelu, izkuopt bazneicys tūrnī i dzierdēt myusu vargaņu breineigū skaniejumu.

Gleznīceibys pleners

Piec dvēseliskuo mīra sajimšonys var apmeklēt 8. Storptautyskuo gleznīceibys plenera “Valdis Bušs 2024” dorbu izstuodi Viļakys muzejā, kur kotrai gleznai ir sovs eipašs i nūteikts stuosts. Kotra glezna topa ar eista gleznuotuoja rūkom, sirdi i dvēseli.

Aktivuo atpyuta “Ezertūrē’’

Tai kai rudiņs myus lutynoj ar korstu laiku, tod var dūtīs iz “Ezertūri”, kur var nūīrēt SUP dieli, katamaranu, laivu, kai ari izbraukt ar tandema velo. Tok, ka plānojat palikt pa nakti, “Ezertūrē” ir vareiba nūīrēt breineigu sieteņu ar apburūšu skotu iz Viļakys vacū solu!

I tys vyss īspiejams pi myusu Viļakā!