Rokstu sagataveja: portals lakuga.lv

29. septembrī Ruskulovys Lurdys Dīvamuotis Romys katuoļu draudze ar svātku dīvakolpuojumu, goreiguos muzykys koncertu, teatra performanci i rudiņa lobumu labdareibys izsūli svieteis Mikeļa dīnu, informej pasuokuma organizatori.

Ruskulovys Lurdys Dīvamuotis Romys katuoļu bazneicai ir cīši boguota viesture. Tei ir vīna nu vacuokūs kūka bazneicu Latgolā. Nazkod draudzē tyka kūptys vysaidys tradicejis, kas saisteitys na viņ ar kristeigū, tok ari laiceigū dzeivi. Vīna nu taidu tradiceju ir Mikeļa dīnys svieteišona. Vacuoki ļauds prota stuosteit, ka nazkod piec miša bazneicys pyunē nūtyka večerinkys – bārni guoja rūtaļuos, lelī doncuoja, tok pravests skaiteja gazetys i stuosteja vysaidus jaunumus.

Kab atguodynuotu par vacajom tradicejom i radeitu jaunys, Ruskulovys draudze aicynoj sevkuru pavadeit Mikeļa dīnys piecpušdīni Ludzys nūvoda Saļņovys pogosta Kūkovys cīmā.

Svietejūt Mikeļa dīnu, svātdiņ, 29. septembrī, 14.00 stuņdēs Ruskulovys Lurdys Dīvamuotis Romys katuoļu bazneicā byus svātku dīvakolpuojums. Tam sekuos goreiguos muzykys koncerts ar Saļņovys kulturys noma goreigūs dzīšmu ansambli “Pieskāriens”, Saļņovys etnografiskū ansambli i gostim nu sābru pogostu. Par bazneicys viesturi stuosteis nūvodpietneica Gunta Ločmele. Sovpus Saļņovys kulturys noma amaterteatris bazneicys duorzā izspielēs nūtikšonys, kas pyrma daudzu godu varēja ci navarēja nūtikt Kūkovys cīmā, performancē “Vīna dīna pūdnīka sātā”.

Tai kai Mikeļa dīna ir rudiņa ražys svātki, nūtiks arī sātys lobumu izsūle, kurā nūpeļneituo nauda tiks zīduota bazneicys svečturu restauracejai. Byus ari cīnuošonuos ar Mikeļa dīnys putru i soltūs mātru čaju.

Pasuokuma organizatori aicynoj jimt leidza fotografejis i daleitīs atmiņuos, kas cīši nūdarātu tuoluokim Ruskulovys Lurdys Dīvamuotis Romys katuoļu bazneicys pietejumim. Mikeļa dīnu Kūkovā organizej Ruskulovys katuoļu draudze i Saļņovys kulturys noms.