Roksta autors: Oskars Orlovs

Ituo teksta autoram kluotyn taids dzeivis etaps, ka par sevi var stuosteit i taisneibu, i malus. Tod īvodvuordūs saceišu tai, ka 2000. godu suokums, kod muna vacuma ļauds beidze vydsškolu i suoce voi raudzeja kur tuoļuok studēt, beja borgs, tok interesants.

Rēzeknē, pīmāram, kai tūlaik, tai ari myusu dīnuos pa šaļteņai kur kaidā pogolmā nūdag pa mašinei. Taisneiba, tradicejis juosagloboj. Voi tī ir vēļ da šam paguojušuo godu symta deveņdasmytūs godu atryugys, voi mašinis suicidi, tū nazyna nivīns. Ari sovus pyrmūs “Nokia” telefonus mes pierkom vīnkuorši – tys, kurs atlēce atpakaļ rūkuos nu flīžuotuos salona greidys, tyka atzeits par lobu asam i tuoļuok spēli “čyuskeņa” varēt dzonuot smaidūšā interesē. Atsateistūt škārsteiklam pasaruodeja vaira īspieju. Failu daleišonuos programa “DC++” suoce sovu gaitu. Varbyut suokūtnejī nūlyuki eistyn beja īspieja apsameineit failim, tok realajā dzeivē tys nūzeimēja piratiski dabuot aizjiuru (i na tik) muzyku i kinys. Myusu dīnuos gryuši pat saprast, ka, lai nūsavērt kaidu kinu, vajadzēja gaideit puors dīnu voi pat nedeļu, kur itymā laikā dators navarēja byut pat atvīnuots nu strāvys. Troki iļgs krystaceļš! Prūtams, tamā programā varēja tikt kluotyn pi audio īrokstūšom programom. I tai datu plyudūs i okeanūs ceņteiguokī maklātuoji varēja atrast mapeitis ar nūsaukumu “DJ GuntiX”.

Koč i DJ GuntiX vīnā vacā intervejā saceja, ka par muzyku tū navar saukt, tok par bradzāklim, faktu, ka taidi jūki nūsatyka, tys namaina. I, ka tys nu suokuma beja dūmuots kai jūks, tok “pasasokūt” kaidim labvielim, vyss īraksteitais tyka “DC++”. A tī kai valnam īdūt mozū piersteņu – jis tod pajam vysu rūku. Vyss palīk internetā. Muna sasatikšona ar DJ GuntiX dailradi, ruodīs, suokuos laikā, kod struoduoju veļ pyrmajā “Latgolys radejā”. Muns īpasazeišonys ceļš beja klasiski ūtraižuoks nakai cytim. Es nu suokuma beju dzierdiejs puors dzīsmeišu, tod viņ tyku pi kinu “Catūrtine”, “Maltečka”, “Buureijc” i “Lykuma draugi” nūsavieršonys. Kai ba nikuo jau tī nav. Puiši ar leidzbīdrim sataisa sovu tekstu pa viersu cytai dzīsmei voi bītam, voi pamaina kinys audio celeņu. Seņuok nazkū leidzeigu Latvejā ir darejs pat Roberts Gūbzeņš. Prūtams, spraunā jauniekļu energejā teksti ir vysaiži nu smīkleigim da lomuvuordu plašuokys izmontuošonys. Varu pabreidynuot, ka YouTubē ir dabojams koč kaids apsaverams i klausams materials, bet juosoka – tī dabojomys viņ druponys. Interesentim juosainteresej pi ļaudim!

Tok vysā vysumā, klausūtīs tūs tekstus (jo teksti maņ pateik), es asu (otkon) nūguojs da fakta – ka tys, kas čiulim latgaliski ruodīs smīkleigi, latgalīšam ir tragikomedeja. Maņ tai patyktūs dūmuot, jo maņ ruodīs, ka DJ GuntiX dailrade ir soldsiereiga. Lai tī voi kai, dzīsmis “Ganeibu grāki” i “Granta bārni” asu dzīduojs sovim krystabārnim. Dzīsmi “Augusts tyvai” īsoku nūsaklauseit školānu vacuokim, a dzīsmi “Eleonora” voi “Lego” nūderēs pošim školānim kaidā viesturis stuņdē. Kai jau vysim leluokim dūmuotuojim, tai augši nūviertieju juo parega spiejis dzīsmē “Riezekne x 3”, citatā “Riezekne, Riezekne, Riezekne. Goreigūs pašnuovnīku vyltus cereiba”. Voi, pīvadumam, myusu dīnu dzeivis alegorejis jiutamys dzīsmē “Svaatki Nr.2 (baba ar vaazi)”: “(..) dzymuse it kai skuolā. Pi seksa atzeimuots veirīts. Kaids veirīts! Iz biļdis tok baba ar vāzi!”

Juosoka veļ taids fakts, ka divejom DJ GuntiX dzīsmem ir topušyus kaverversejis. Vīna dzīsmei “Donats” grupys “Jezups i muosys” izpiļdiejumā, a ūtra dzīsmei “Cuoleic” meitiņu grupys “Trešais Ņutona lykums” izpiļdejumā.

Tai tī citati nu DJ GuntiX dailradis sekoj sev kasdīnā. Es pats navaru saprast, kai jī īguojuši kasdīnys runā i turpynoj dzeivuot plotuok. Taišni, ka DJ GuntiX dailrade ir guojuse plotuok par Latgolys rūbežim, es saprotu, kod sasapazynu ar sabīdreibā zynomim cylvākim. I tī byutu – rakstnīks Juoņs Jonevs, komiks i šovmeņs Edgars Bāliņš, muokslinīks Reinis Pētersons i arhitekts Artis Zvirgzdiņš. Pyrmais naveiklais moments beja 2015. godā, kod rezidieju Storptautyskajā tulkuotuoju i rakstnīku sātā Ventspilī. Tī sasapazynu ar Juoni Jonevu i vīnā sarunys laikā pasceju nazkaidu DJ GuntiX tekstu, kuru vaira napīmiņu, tok pīmiņu, ka maņ beja kauns, kod Jonevs maņ aizruodeja i pīlobuoja saceitū. Tod maņ saskrēja kauns, ka es te taids rakstnīceņš, kurais atbraucs nu Latgolys, pasamona citēt vysaidus citatus ar klaidom. Šausmeigi vēļ niule tū atguoduot. Tuoļuok, mainūt profesejis i piļsātys, pīsadolūt vīnā diskuseju vokorā myusu metropolē, pīfiksieju, ka J. Jonevs ar R. Pētersonu vysu vokoru nūrunuoja, izmontojūt DJ GuntiX dailradis citatus. Beju cīšyn puorsteigs i turpynuoju sēdēt styurī klusai, nervozi peipejūt, kab napuortraukt itū dialogu. Tuoļuok ar Edgaru Bāliņu īpasazynom, taišni pasasokūt DJ GuntiX muzykai. Apsamainejom ar dabuotajim audio materialim. Lela beja bāda, ka nivīnam nu mums nabeja DJ GuntiX agreimūs aļbumu “Munja Zjamja (Vertikshnis veci)” i “Latgalis dzeja”. Obeji datejami ar 2003. godu. Munys i Edgara bādys nabeja dīzkū i iļgys, viņ puora mieneši voi godi, cikom pi apvuoršņa pasaruodeja arhitekts Artis Zvirgzdiņš. Sarunos ar Arti atsakluoja, ka jis sekoj leidza latgalīšu muzykys izpausmem: “Maņ ruodīs, koč kai daudz raudzeju klauseitīs vysaidu latgalīšu muzyku. Kas nu tī (DC++) beja. “Borowa Mc”, “Dabasu Durovys”, “Bez PVN” i kū nu tī vēļ. Raudzeju tū latgaliskumu saklauseit, tok mani tei eisti nauzrunuoja… Tok DJ GuntiX nu pyrmūs gobolu, iz reizis!”

Iz vaicuojumu, kod tod DJ GuntiX dailrade ir īguojuse jūs dzeivē, puiši soka tai. Edgars Bāliņš: “Napasaceišu, cik maņ beja godu, varātu byut ap 2008. godu, bet skaidri atguodoju, ka pyrmūreiz maņ izlyka kinu “Maltečka” i es eistyn smiejūs, vuoļuodamīs pa zemi. Nikod nikuo tik ospruoteiga nabeju redziejs.” Juoņam Jonevam otkon ir sovs stuosts: “Tu naspiej maineit liktini! 2004. godā es siedieju Latvejis leluokuos reklamys agenturys birojā, apleik dyuce printeri i čaluoja projektu vadeituojis, bet ari tī liktiņs mani dabova rūkā. Kolegis Voldemārs atnese kinu “Maltečka”. Piečuok tam atguoja muzyka.”

Prūtams, daudzi ituo roksta skaiteituoji, voi nu nazynuoja par DJ GuntiX, voi zynuoja moz. Bet es pīkreitu uzrunuotūs puišu saceitajam, ka itei dailrade ir spūdra, atsvaidzynūša zvaigzne iz Latgolā vys tik dominejūšuos stereotipiskuos šlageru muzykys. I nav nikaids breinums, kai obeji puiši soka, ka cīši daudzus citatus i nu kinu, i muzykys saīt izmontuot, komunicejūt ar cilvākim, kuri ari ir DJ GuntiX rodūšuos izpausmis cīnetuoji, i taidu patīseibā nav moz, it eipaši rodūšajā lauceņā. “Ir cilvāki, ar kurim pi pyrmuos izdeveibys pīmekliejom kaidu citatu. Naseņ, pīvadumam, variejom saceit: “Nu! Par olimpiskajom spielem!”” tai E. Bāliņš. Bet rakstnīks J. Jonevs soka, ka “dzer panenis, ēd suharus!” ir lobuokais reklamys slogans, vysod īdvasmoj! I “navāg nūkuort dagunu, ruodu bādom dybynu!” ir motivejūša mantra.

Vysleluokais muns poša puorsteigums ir taišņi tys, ka DJ GuntiX dailrade jau ir īsaguojuse kai folklora. Puorsteigums nu tuo, ka varbyut ni konkreti Latgolā voi storp Latgolys rodūšajim pruotim, bet taišni uorpus Latgolys kulturtelpys. I guodoju, ka nūteikti ir vēļ kaids naatkluots DJ GuntiX fans, kurais voi kuruo kautreigi globojās i nimoz nagrib byut atkluots. Taipoš kai pats autors DJ GuntiX.

Vysā nūslāgumā otkon juocitej Jonevs, kurs itū DJ GuntiX fenomenu nūraksturoj tai: “Jis ir paveics tū, kū raugu ari es – padarejs sovu jauneibys i mītnis vītu par pasauļa centru, izbyuviejs sovu kosmosu ar sovim dīvim i mitim. Jis narauga byut stileigs, kas maņ ir svareigi. I jis muok i nesabeist byut absurds.”

Duorgais laseituoj! Meklejit i klausitēs sovaižuoku muzyku, na viņ tū, kas skaņ pa radeju. Lai vysim veiksme meklejūt!

P.S Edgara Bāliņa “DJ GuntiX TOP 3” – “Maltečka”, “Magnetafon6iks”, “Buureijc”. Taišni itaidā seceibā.
Juoņa Joneva “DJ GuntiX TOP 3” – “Defekts” (par genialū pīdzīduojumu), “Papirosa” (par kruošņū pīdzeivuojumu. “Feini paguoja dīna!”), “Likumi” – par bezkompromisa skorbumu.