Aicynoj dasaceit pretendentus Latgolys Senioru bolvai
Rokstu sagataveja: portals lakuga.lv
Piļsūniskuos sabīdreibys organizaceja “New East” reikoj Latgolys Senioru bolvu 2024, kab gūdynuotu seniorus vacumā nu 55 godu, kas ar sovu dorbu i iniciativom pamatuši pozitivu ītekmi iz vītejū sabīdreibu. Bolvys mierkis ir izceļt i apbolvuot seniorus, kas aktivai veicynoj socialū atteisteibu, kulturys i izgleiteibys dzeivi, kai ari paleidz ceineitīs pret sabīdreibys polarizaceju i dezinformaceju.
Latgolys Senioru bolva 2024 teik reikuota, kab nūvārstu vacuoka godaguojuma cylvāku socialū izsliegšonu i veicynuotu senioru leidzdaleibu sabīdryskajuos aktivitatēs. Konkursa organizatori grib izceļt senioru īguļdejumu vysaiduos dzeivis jūmuos i skubynuot kai jaunīšus, tai plotuoku sabīdreibu vaira īsasaisteit i atbaļsteit vacuoka godaguojuma cylvāku potencialu.
Konkurss teik organizāts pīcuos nominacejuos, kotra izceļ kaidu konkretu senioru darbeibys jūmu:
- Īguļdejums izgleiteibys jūmā – par senioru davumu formalajā i naformalajā izgleiteibā, veicynojūt zynuošonu puornesi i pozitivys puormainis sabīdreibā;
- Kultura i montuojums – par senioru īguļdejumu kulturys i viesturis montuojuma saglobuošonā i nūdūšonā paaudzem iz prīšku;
- Medeji – par senioru aktivū darbeibu medeju jūmā, veidojūt sabīdreibai nūzeimeigu saturu žurnalistikā, publicistikā, video, audio voi digitalajā formatā;
- Piļsūniskais aktivisms i socialuo jūma – par īguļdejumu piļsūniskajuos i socialajuos iniciativuos, uzlobojūt socialūs apstuokļus i dzeivis kvalitati sovuos kūpīnuos;
- Sabīdreibys salīdiešona – par senioru dorbu sabīdreibys polarizacejis mazynuošonā i cīšuokys sadarbeibys veicynuošonā vysaidu etnisku grupu vydā.
Dasacejumi juoīsnādz da 30. septembra 10.00 stuņžu. Apbolvuojumi tiks padūti 4. oktobrī svineigajā Latgolys Senioru forumā Daugovpilī, svietejūt Storptautyskū senioru dīnu.
Kandidatus var dasaceit sevkurs interesents. Kab tū izdareitu, juoaizpylda veidlopa, nūruodūt kandidata vuordu, kontaktinformaceju, darbeibys aprokstu i pamatuojumu bolvys pīškieršonai. Dasacejumi teik pījimti elektroniski iz e-postu: contact@neweasteurope.com voi aizpyldūt tīšsaistis formu ITE. Ar konkursa nūlykumu var īpasazeit ITE.
