Rokstu sagataveja: portals lakuga.lv

Kulturys īsacejumus itai nedeļai sagatavejuse literate, bibliotekare i gruomotu blogere Meldra Gailāne. Jei īsoka vēļ īspēt apsavērt tautystārpim veļteitū fotoizstuodi “Piecgarša” Lūznovys muižā, napalaist garum nakonferenci jaunīšim “Grāmata un telefons. Atklātais rings”, kai ari nedeļgolu pavadeit Rēzeknē.

“Piecgarša” Lūznovā

Tai pavysam dreiži i septembris dūdās paceli. Vosorys izskaņā, nui, nui, itymā godā septembris vēļ ir vosorys mieness, var dūtīs iz Lūznovys muižu, kab apsavārtu izstuodi “Piecgarša” i, kas zyna, varbyut atrostu kaidu pazeistamu seju biļdēs. Jau piec 28. septembra izstuode brauks tuoļuok iz Varakļuonim.

Izstuodē fotografejuos radzamys leleitis-tautumeitys nu izstuodis “Lobs ar lobu sasatyka” kūpā ar Latvejis cylvākim – tautystārpu nosuotuojim. Tei ir kai loba piecgarša paguojušuo goda dzīšmu i deju svātkim. Projektā sasadorbuojuse tautystārpu nosuošonys entuziaste Iveta Seimanova, fotografe Sintija Cērpiņa, multimuokslineica i projekta logo autore Evika Muizniece, kai ari Zvīdrejā dzeivojūša latvīšu izaceļšonys muokslineica Kristīne Lagzda Haapanen, veļtejūt kotrai fotografejai zeimiejumu – dūmu lineju.

Gruomota voi telepons?

Školuotuoji, bibliotekari i cyti pīaugušī syt trauksmi, ka bārni vaira naskaita gruomotys, a vysu sovu laiku pavoda teleponūs. 26. septembrī Preiļūs Golvonajā bibliotekā nūtiks nakonference jaunīšim “Grāmata un telefons. Atklātais rings”, kurymā raudzeis nūskaidrot, kai tod ir ar tū gruomotu skaiteišonu jaunīšu vydā, kai ari varēs paraudzeit saraksteit kaidu sovu aili i īsavuiceit tū nūrepuot.

Nedeļgols Rēzeknē

Nedeļgolā juobrauc iz Rēzekni! 28. septembrī “Gorā” juoaizīt iz Aijai Rimšai, Latgolys laksteigolai, veļteitū koncertu “Kā tauriņi gaismā”, bet 29. septembrī – iz Mikeļa dīnys godatiergu “Buļbu tolka ar dzīduošonu i doncuošonu”. Nu reita 10 stuņžu da piecpušdīnis 15.00 vysā Latgolys īlys garumā byus tierguošonuos, koncerti, retro auto, meistarklasis i rodūšuos darbneicys. Dareit kū byus i lelam, i mozam!

A svareiguokais īsacejums byus – atrūnit laiku poši sev! Rudiņam pīstuov sasarytynuot dečī, pajimt sylta čaja krušku i mīreigi pasavērt pa lūgu, aiz kura skrīn dzeive ci aust jauna dīna.