Dzejūļu autore: Rasma Svikle

Portala lakuga.lv skaiteituojim pīduovojam Rasmys Sviklis dzejūļus. Autore itūgod tyka pi 3. vītys dzejis slamā “Rogovkys dzejis voga”, jei ari vīneiguo, kas itamā dzejnīku saceņseibā pīsadalejuse vysus treis godus. Par sovim dzejūlim Rasma soka: “Tī ir apleicejuos dzeivis atspulgs. Tī ir par pīdzeivuotū, dzierdātu, radzātū. Daži liriski, pylni puordūmu, cyti ironiski, drupeit dzieleigi. Kai jau dzeive – daudzveideiga.”

Saliduojums

Dīva goldi
gostu pylni
Muora meiluo
pušdīnis taisa

klaudz papīži
skaņ sūli
draugi anekdotus
stuosta

cyti klusom
pabādoj
izdzer pa čarkai
nu dabasu golda

kur tei meitine
dzaltonom bizem?
jai saule bej’ motūs
jei skrēja pi bitem

i kur tys zāns
kū nūsyta elektreiba?
kai jis dzīduo’
jam labi saguo’

Dīva goldi
gostu pylni
Muora meiluo
pušdīnis taisa

salidoj absolventi
iz jubileju
pādejuo škola
apleicīnē slāgta

***
Vacajā sātā

vysi bārni aizguoja
atpakaļ atguoja nivīns
sapyva pogroba durovys
izkryta aņgis
vacajai uobelei
nūmyra uobeli
itūzīm
apglobuoja zam snīga
zori krystā
zori kai rūkys
lyudzās
nūsamat ceļūs
nūskaita
Tāvs myusu
Esi sveicynuota

pavasarī
atliduos storki
vacajā skurstinī
dzeiveibu īdvess
nakts kai dyumi
īsaviļks motūs
i driebēs smarža
natiksi vaļā

atīsi
nūkrissi ceļūs
skaiteisi
pīdūd tāvs
pīdūd muote
atpestej myus

*** 
Muote

siež muote
aizaugušā duorzā
pi vacuos kliets
pārnejuo zuole
našmuka bryuna
nav spāka
ni nūdadzynuot
ni nūkast

lyupys māmai kust
tik par bārnim lyudz
par tū kas jau kopūs
i par tū kas Reigā
nav zvanejs pīcus godus
a mož vaira
kas vairs atguodoj
laiks sateciejs
kai sveki iz goldauta
palics nakusteigs

siež muote
aizaugušā duorzā
smuordej piec zemis
īt pavasars
maņ vajag mīra

*** 
Osorys

div godi
nabeja rauduots
septembris
suocās vātra
i osorys spruka
nu dabasim
nu kūkim lopom
nu zuolis
nu mieteļa kabatom
i nu saujis

tik acs
palyka tukšys
sausys
saplaisovušs
kai muols
kolna golā
pazuda saule
pretim īt nakts
muns nikod
nadzymušais bārns

***
Kopusvātki

BBC
jeb
baba babai saceja

tei atbrauca bez veira
nu da
nagrib cylvākūs īt

kas itai par driebem
kai iz karnevalu
ni kauna ni gūda

pi jim naatbrauce bārni
nūteikti otkon sasaspuoruoja
pasaver cik nūpītni

jis braukalej pi bryutis
valna pīgulātuojs
tok nasalomoj!

tī obi lobi cylvāki
tik bārni taidi jūceigi
vīns izaver kaimiņa

kū tī prīsters saceja?
nadzierdieju
jam suoce zvaneit telepons
jis aizmiersa vuordus
pateiceiba Dīvam

***
Rupuči

pi muorka
pylns rupuču
salein krokšūs
durās pi kuoju
aizkreit aiz apaklis
vīns nu mutis izlein
tāloj priņci
i māduos
kura mani precēs?