Rokstu sagataveja: portals lakuga.lv

Hiphopa muokslinīki ansis i Ūga, pīsadolūt projektā “Putāns. Toreiz un tagad”, radejuši dzīsmis ar legendom apveituo 20. godu symta latgalīšu dzejnīka Seimaņa Putāna dzeju, informej muokslinīku puorstuove Inese Grīnberga. Laikmeteigajuos dzejis interpretacejuos iz hiphopa bīta nazkodejais dumpinīcyskais gors saplyust ar myusdīneigū latgaliski i atdzejuojumā latvīšu literarajā volūdā. Muzykalūs pavadejumus taisejs Nikita Grapp (“Ausmeņa Records”).

Repers, muzykys producents i bītmeikeru dueta “Netīrās Cilpas” puorstuovs ansis atkluoj: “Maņ Putāns tyka dasaceits praktiski kai repers pyrma reps beja līta. Īpasazeistūt ar dzejūlim, redzīs, nūjaušu, deļkuo — bīži jiutama autora byušona kluotyn i personeigī puordzeivuojumi, attīceibys ar rodūšumu i pošizpausmi, šaļtim — napuorprūtams tīšums, labi jiutams socialais komentars, vierteibu sistemys i seve poša analize, gribiešona izprast i sadzeivuot ar pasauli, nasaverūt iz vysu tuos mūkūšūs tryukumu. Ari dzejūļu kompozicejā — tamā, kai veidojās ainys — ir koč kas radnīceigs liriskuokim repa dzīšmu tekstim. Piec tuo, kod paraudzejom dzejnīka vuordus izlikt iz bīta, švuorbu vaira nabeja: reps kas reps.”

Obeju muokslinīku jaunradeituos dzīsmis “Kosmiskuo šaļts” (izpylda ansis) i “Kovchegs” (izpylda Ūga) daīmamys straumiešonys servisūs. Itī ir pyrmī singli nu gaidomuo albuma “Caur bolsim as eju”, kurā apkūpuoti hiphopa skaņdorbi ar Putāna dzeju.

“Kompoziceja “Kovchegs” roduos, īsadvasmojūt nu dzejūļa par vyspasauļa plyudim i Noasa škierstu, kas devēs meklēt gluobeņu Dīva struopis laikā. Pa munam, sevkurs, kurs klauseisīs itū dzīsmi i izjuss dzejnīka nūdūtū emocionalū dziļumu, spēs kūpā ar mani pīdzeivuot škiersta ceļuojumu. Itamā kompozicejā kristalizejās dzejnīka skots iz pasauli, atkluojūt juo attīksmi pret taisneigumu i dzeivis byuteibu,” stuosta Ūga, latgalīšu repere i koncertizruodis “Putāns. Toreiz un tagad” rodūšuo vadeituoja.

Projekta “Putāns. Toreiz un tagad” laikā paradzātys vairuokys nūtikšonys. Ituo gods oktobra beiguos tiks prezentāta dzejnīka Seimaņa Putāna dzejis gruomota. Novembra suokuos Rēzeknis nūvodā nūtiks “Putāna nedeļa” i pi klauseituoju tiks albums “Caur bolsim as eju”, kū izdūs ari vinilplatē.

“Gaidomajā platē jius dzierdēsit na tik repmuzyku – es i muns kolegs Nikita Grapp asam īguojuši dziļuok muokslā, rodūt dorbus, kas varātu uzrunuot ari tūs, kas kasdīnā nasaklausa repu. Seimaņa Putāna dzeja repmuzykā i drupeit liriskuokā izskaniejumā pīškir itai platei eipašu skaniejumu, kas byus baudams plašuokai auditorejai,” nūruoda Ūga.

Jau viesteits, ka 9. novembrī 18.00 stuņdēs Latgolys viestnīceibā “Gors” nūtiks koncertizruodis “Putāns. Toreiz un Tagad” pyrmizruode, kurā varēs pīdzeivuot dzejnīka Seimaņa Putāna dzejis laikmeteiguos interpretacejis kai latgaliski, tai ari atdzejuojumūs latvīšu volūdā. Izvadumā dzejūli tiks pīlāguoti rečitativam iz hiphopa bīta (muzykaluo pavadejuma) reperu Ūgys, Gustavo, anša i cytu latgalīšu muokslinīku izpiļdejumā. Sovutīs Juoņs Skutelis aba Dekšuorīts koncertizruodē byus atbiļdeigs par režeju i dzejūļu deklamiešonys variacejom.