Rokstu sagataveja: portals lakuga.lv

28. septembrī Kruoslovys kulturys nomā nūtyka Nikodema Rancāna konkursa nūslāguma pasuokums. Kai informej Latgalīšu kulturys bīdreibys vadeituoja Ilga Šuplinska, itūgod tymā padūtys pīcys sudobra pokovsaktys i divejis specialuos bolvys.

Nominacejā par īguļdejumu i sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školā bolvu sajēme Ludzys Muzykys pamatškolys školuotuoja, folklorys kūpys “Ilža” vadeituoja Dace Tihovska. Kai saceja bolvys padevieja Latgalīšu volūdys, literaturys i kulturviesturis školuotuoju asociacejis vadeituoja Veronika Dundure: “Daudzu školuotuoju kasdīna i labi padareita dorba atslāgs ir īsadreikstiešona. Dace īsadreikst vaira, kai nu juos prosa i sagaida.” Jai tyka padūta ari Latgolys Etnografiskuos viestnīceibys eipašuo bolva – lele pošdarynuotā etnografiskā tautystārpā. Taipoš bolvu itamā nominacejā sajēme Viļānu Muzykys i muokslys školys školuotuoja Anita Vulāne, kuru atbaļsteit beja atbraukuši ari juos školāni, kū školuotuoja īsaista latgaliskuos nūtikšonuos. Ari Anita tyka sumynuota divejis reizis, partū ka tyka par pyrmū Latvejis Izgleiteibys i zynuotnis darbinīku orūdbīdreibys (LIZDA) īdybynuotuos eipašuos bolvys – smilkšu stuņdinīka – sajiemieju. Vairuokys bolvys laureatis sovuos uzrunuos lyudze pīdūšonu sovom saimem, sovim bārnim, partū ka leluokuo laika daļa pavadeita školā, ryupejūtīs par cytu bārnim. Smilkšu stuņdinīks ir kai simbolisks atguodynuojums tam, ka dzeive naapsastuoj ni iz šaļtenu i kaida šaļts juoveļtej ari sev.

Latgolys Etnografiskuos viestnīceibys vadeituoja Iveta Seimanova, kas ir ari PII “Annele” školuotuoja Reigā, na tik padeve eipašū bolvu, bet ari poša tyka pi N. Rancāna bolvys. Žureja nūviertēja juos sirdsdorbu kai bārnuduorzā, tai uorpus tuo. I. Seimanova ar sovys komandys paleidzeibu jau ir realizējuse vairuokus projektus, kas uztur etnografiskuo tautystārpa izgleituošonys, komplektiešonys i pietnīceibys dorbu. Kai saceja poša dareituoja – 80. lele nuokušajā nedeļā ceļuos iz Sielejis kongresu.

Nominacejā par rodūšu i psihologiski atbolstūšu pīeju vuiceibu ci studeju vidē gūdynuoja divejis školuotuojis: Kruoslovys Varaveiksnis vydsškolys ilggadeju školuotuoju Irinu Gončarovu i Rēzeknis Vaļsts pūļu gimnazejis direktori i svešvolūdu školuotuoju Olgu Burovu.

Taipoš atzineibys nu Latgalīšu kulturys bīdreibys i Rēzeknis Tehnologeju akademejis, a LIZDA bīdrim ari sovys organizacejis saryupātuos bolvys sajēme: Inta Lāce (Rēzeknis suokumškola), Sarmīte Vagele (Daugovpiļs Draudzeiguo aicynuojuma vydsškola), Nadežda Adamoviča (Kruoslovys Varaveiksnis vydsškola) i Inguna Pašāne (Nautrānu vydsškola).

Nūslāguma pasuokuma daleibnīki varēja prīcuotīs leidza ar nominantim par eisajim video par školuotuojim, īsasaisteit attālu rebusa miniejumūs, baudeit Kruoslovys pusis muzykalū i kulinarū montuojumu, kai ari vīnkuorši sirsneigi pavadeit laiku sūpluok.

Konkursu organizēja i žureju puorstuovēja Latgalīšu kulturys bīdreiba sadarbeibā ar Kruoslovys nūvoda pošvaļdeibu. Pasuokumu finansiali atbaļsteja ari Rēzeknis Tehnologeju akademeja, Latgolys Etnografiskuo viestnīceiba i LIZDA.

Video nu pasuokuma var nūsavērt Latgolys kongresa YouTube kontā.