Rokstu sagataveja: portals lakuga.lv

Pi skaiteituoju tics žurnala “A12” oktobra/novembra numers i tymā var puorskaiteit intervejis ar vīglatleti Guntu Vaičuli i juos veiru lauksaiminīku Mārteņu, Rykovys etnografiskuo ansambļa vadeituoju Aiju Dunduri, Rēzeknis Tautys teatra scenografi, kostimu muokslineicu i aktrisi Ināru Apeli i cytys sarunys i stuostus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce ituo numera īvodā soka: “Vosora kuortejū reizi pīruodeja, ka kulturys pasuokumu daudzveideibā i pīduovuojumā asam napuorspiejami – kotruos breivdīnuos vysaidu žanru i nūtikšonu kluosts, tik juoīspiej pīsadaleit, nūsaklauseit voi nūsavērt. Varbyut kultura ari ir tei, kura paleidz nūticēt sev i lobajam, byut placu pi placa i dareit?”

Žurnala “A12” oktobra/novembra numerī skaitit:

• Sportiste Gunta Vaičule stuosta par pīredzi Parizis olimpiskajuos spēlēs, par byutyskū meitys audzynuošonā i saimnīkuošonu Zundūs kūpā ar veiru Mārteņu.

• Kū par sovu profeseju dūmoj pādejais aktivais stykla pyusšonys meistars? Aleksandrs Logvins ar sovu sirdslītu nūsadorboj jau 40 godu.

• Izcileibys bolva Rēzeknis Tautys teatram – scenografe, kostimu muokslineica i aktrise Ināra Apele stuosta, kaids ir teatra panuokumu atslāgs.

• Tautystārpu meistare Maija Kulakova pastreipoj, cik nūzeimeigi ir vuiceitīs rūkdorbus, kab atteisteitu smedziņu darbeibu.

• Arnis Krancāns – par vareibom Sarkaņkolnā i potencialu, kū snādz Latvejis doba.

• Muokslys sarunys ar Valentīnu Petjko – vīnu nu Latvejis Laikmeteiguos keramikys centra komandys i Latvejis Keramikys bienalis organizatoru. Voi Daugovpiļs puorsamej leidz ar laikmeteiguos muokslys nūtikšonom piļsātā?

• Futbols Latgolys i pasauļa stadionūs. Latgolys futbola fana pīzeimis.

• Sātys kopejneicu dīnys i casnāgu audziešona kai hobejs. Gasteišona pi Škilbānu pogosta zemnīkim – dveiņubruolim Juoņa i Jura Supem.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – ar Ināru Apeli i Maiju Kulakovu sasarunoj Laura Melne, bet M. Kulakovys fotografejis sagatavejuse Amanda Anusāne. Taipat žurnalā puorskaitoma portala redakcejis sagataveituo informaceja par jaunuokajim gruomotu i muzykys īrokstu izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturyskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.