Rokstu sagataveja: portals lakuga.lv

15. oktobrī Bolvūs i 29. oktobrī Rēzeknē byus rodūšūs seminaru cykla “Spāka LAB” nūtikšonys, kurūs mierkis ir Latgolys kulturys dzeivis organizātuoju i navaļstiskūs organizaceju puorstuovu kapacitatis ceļšona. Kai viestej seminaru reikuotuoji, “Spāka LAB” Bolvūs aicynuos izzynuot vaira ap pasuokumu reikuošonu i komunikaceju, taipat i latgalīšu rokstu volūdu, bet Rēzeknis seminarā tiks vaira runuots ap kvalitativu sadarbeibu ar medejim.

Ūtardiņ, 15. oktobrī, nu 10 da 15 stuņžu Bolvūs (Bolvu Kulturys i atpyutys centrā) byus “Spāka LAB” seminars “Pasuokumu reikuošona: naīrosti koncepti, komunikaceja i latgalīšu volūda afišuos”. Tymā ar stuostu ap pasuokumu taiseišonys naīrostajim konceptim moza budžeta nūtikšonom, komandys motiviešonu i cytim ar pasuokumu reikuošonu saisteiti aspektim pīsadaleis režisore i rodūšuo direktore Una Rozenbauma, ap nūtikšonu publicitatis kampaņu i dizainu, kurūs savīnuos tradicionalū i laikmeteigū, stuosteis rodūšuo direktore i dizaina i komunikacejis studejis “AUSME” leidzadybynuotuoja Dārta Apsīte, bet Vaļsts volūdys centra lingviste Māra Mortuzāne-Muravska stuosteis ap latgalīšu volūdys lītuošonu i pareizraksteibu pasuokumu afišuos, kas niu svareigu pošvaļdeoibu aizdavumūs ap latgaliskuos identitatis saglobuošonu Latvīšu viesturyskūs zemu lykuma kontekstā. Pīsasaceit seminaram var da 14. oktobra, anketa i pylna programa: https://ej.uz/SPAKA_LAB_Bolvi.

Oktobra golā, 29. oktobrī, nu 10 da 15 stuņžu Rēzekne (Latgolys viestnīceibā “Gors”) byus “Spāka LAB” seminars “Pasuokumu publicitate: attīceibys ar medejim i redakceju gaidys”. Seminara pyrmajā daļā ar stuostu, kai sagataveit kvalitativu informaceju i veiduot attīceibys ar medejim, pasadaleis komunikacejis nūzaris profesionale ar vaira nakai 20 godu praktiskū pīredzi Kristīne Tjarve, bet ūtrajā daļā Latvejis Radejis Latgolys multimedeju studejis vadeituoja Renāte Lazdiņa i portala TVNET kulturys redaktors Tuoms (Toms) Treibergs pīduovuos apsavērt, kaids ir masu medeju dorbs. Seminara nūslāguma sarunā “Medeji i kulturys informaceja. Kai uzturēt naatkareigys, bet lobys attīceibys?” interesentim byus vareiba izzynuot vaira ap Latvejis Radejis, TVNET, Latgolys Regionaluos televizejis i latgalīšu kulturys ziņu portala lakuga.lv redakceju i žurnalistu dorbu. Seminara mierkis ir ceļt Latgolys kulturys dzeivis organizātuoju, navaļstiskūs organizaceju puorstuovu i cytu interesentu zynuošonu ap kvalitativu komunikaceju ar medejim. Pīsasaceit seminarim var da 25. oktobra, anketa i pylna programa: https://ej.uz/SPAKA_LAB_Rezekne.

Pyrmī “Spāka LAB” rodūšī seminari, kas veļteiti Latgolys kulturys dzeivis organizātuoju i navaļstiskūs organizaceju puorstuovu kapacitatis styprynuošonai i ideju apsamaineišonai, nūtyka 2023. gods suokuos. Da ituo seminari, kuruos runuots ap komunikacejis prasmu styprynuošonu, vītu stuostu veiduošonu, jaunīšu īsasaisteišonu tradicionalajā kulturā i jaunu pasuokumu ideju radeišonu, nūtykuši Kuorsovā, Daugovpilī, Preiļūs, Leivuonā, bet itūgod tī byus Bolvūs i Rēzeknē. Rodūšūs seminaru cyklu pārņ ar Latvejis Republikys Kulturys ministrejis i Latvejis Nacionaluo kulturys centra atbolstu aizsuoce latgalīšu kulturys kusteiba “Volūda” i kulturys instituts “New East”. Ituo gods seminaru reikuotuojs ir latgalīšu kulturys kusteiba “Volūda”.

Obeji seminari byus kluotīnē i interesanti var pīsadaleit bez moksys. Grybātuoji, atzeimejūt anketā, varēs sajimt Latvejis Nacionaluo kulturys centra aplīcynuojumus par pīsadaleišonu seminarā.