Dzejūļu autore: Dagneja

Portala lakuga.lv skaiteituojim pīduovojam dzejneicys Dagnejis jaunuokuos ailis. Kai soka poša autore, tuos ir “par apsastuošonu i klusumu (tīkumu), par īšonu iz prīšku i īšku”.

***

Izlic, izlic sirds okulerus, par reizi īraudzeisi jaunus pasauļus,
cīmata centrā puorskrīsi ar sorkonu ferari
i zvaigznis tev ruodeis pareizūs ceļus…

Osais čillix aizdadzynuos tev muti kai olimpiskū guni
i variesi saut ar vysprecizuokajim vuordim kai ziernim,
tim eistajim taišni laikā i sirdī.

Drūsai, drūsai vaicoj pīdzeivuojumus koč kotru nakti,
šaļts eistums izdzonuos baileiguos dūmys
i mienesnīks damīgs ar zvaigžņu aci…

Prūtams, ka izgluobs tevi mīlesteiba,
kura ir kai WiFi – nav radzama,
bet vysim cīši VAJADZEIGA.

***

tīkums kai mygla apjam vydspusi
kur tovejī šveiksti atsabolsoj dziļumā
tī ir gluosti naapjaustim dvieselis styurim
kai pīdzeivuojums aiztaiseitom acim
jiutys kai straumis plyust bez rūbežu
kotrā šaļtī aizdadzūt jaunys dzierkstelis
i mes kai doba elpojam vīnā ritmā
kod kaisleigi pīsaskaram
daže nasasateikūt

***

piļsāta attaisa acs ar īlu plakstenim
asfaļta svīdri smuordej piec benzina
vacajā tiergā buļbu gubenis
stuov kai klusuma skulpturys
es asmu

reklamys smīdamuos rauga apēst zvaigznis
bet juos klusejūt pagaist dabasu kārmanūs
i piļsāta vysa kust kai myužeigs karnevals
kur kotrys lūgs kotrys pakss kotrys kūks
ir kai gīms kurs mainuos i
izgaist kai aizablūdiejušs ānys

itei aina varātum byut tik
sapyns voi halucinaceja
bet ar buļbu rūkā
es vīnkuorši asmu
i kotrys muns sūļs atsabolsoj
zemis dzejūļūs
kurus viejs skaita nu pakšu
kai attaiseitu gruomotu

***

nazkai vyss na tai
jaunajim bārnim
vuicom vacu vakardīnu
naļaunūt pošim
radeit lobuoka pasauļa
sasystūs spīgeļūs
gribim īraudzeit byuteibys
a jī grib īraudzeit
myusu smaideigūs gīmus
daže zyrgi iz pierstu golu staigojūt
vuica iz prīšku
na atpakaļ ĪT

***

ceļš ir prīškā tik sūli pagaist
tīkums palīk vīneigais sarunu bīdrys
voi atbiļde vyspuor eksistej voi ir tikai
sapyns kuru mes giunam
i tai ari nikod nanūgiunam

***

salosūt desmit tyukstūšys sūļu dīnā
tu salosi ari munys simpatejis
es nazynu sovys vītys tev pruotā
bet jiutu mozu drupeiti sirdī
ka maņ nabyus kur īt
es īšu iz sātu
kur pogolmā
karūgs ruoda eistū ceļu
10 tyukstūšys sūļu
atpakaļ pi seve