Kulturys īsacejumi nedeļai: izruode latgaliski pīaugušajim, bārnim i byušona kūpā
Rokstu sagataveja: portals lakuga.lv
Kulturys īsacejumus itai nedeļai sagatavejuse Daugovpiļs teatra aktrise Zanda Mankopa, kura gatavejās lelai nūtikšonai – 16. oktobrī pyrmizruodi pīdzeivuos jauna izruode latgaliski “Kaids nūteikti atīs”. Zandu iz skotivis itūnedeļ varēs redzēt ari izruodē “Spreideits”, kur jei īsajiut golvonajā lūmā. Partū ari aktrise aicynoj apmeklēt Daugovpiļs teatri, kai ari naaizmierst par byušonu kūpā ar sovim tyvajim.
“Kaids nūteikti atīs”
16. oktobrī 18.30 stuņdēs “pīdzims” jauna izruode. Tei stuosta par puori, kuri īsarūn sovā jaunajā sātā. Tuoli paceli nu vysa i vysu. Tok, aizbāgūt paceli nu vysu, palīkūt vīnim, mes vystik naizbāgami sasatiksim ar kaidu – poši ar sevi. Nui – “kaids nūteikti atīs”. Tok, kas ir tys “kaids” – tei ir fiziska persona voi ari “kaids” ir koč kas, kas ir myusim vydā… Myusu dūmys, bailis, traumys… I kū tys “kaids” var nūdareit mums i tim, kas ir mums sūpluok. Par tū varēs aizadūmuot, atīmūt iz itū izruodi. Kaida maņa nūteikti tiks “aizgiuta” kotram skateituojam.
“Spreideits”
18. oktobrī 12.00 stuņdēs kūpā ar Spreideiti dūsimēs laimis mekliejumūs. Caur vysaidim puorbaudejumim, ar kurim Spreideits sasatiks sovā ceļā, raudzeisim saprast – kas tod, gols golā, ir tei laime? Voi laime ir naudā? Voi laime ir montā? Voi laime ir atrūnama kaidā konkretā vītā? Voi laime ir cytūs cylvākūs? Voi varbyut eistuo laime ir meklejama myusūs pošūs? Sirsneiga, kūša, spraiga izruode latgalīšu volūdā.
Grybātu vēļ pasadaleit, ka kina “Sprīdītis” beja muna meiluokuo, kod beju bārns. Zynuoju vysus tekstus, vysu dzīšmu vuordus! Asu cīši pateiceiga par vareibu spielēt itamā izruodē.
Byut kūpā
Aicynoju vysus itūnedeļ sevkurā laikā pīsadaleit pasuokumā “padareisim koč kū kūpā”. Voi tys “koč kas” byutu ar saimi, draugim, sev tyvim cylvākim – golvonais “padareisim koč kū kūpā”. Izbaudeisim rudini, kas jau ir suocīs! Voi tei byus pastaiga pa cītūksni, kaidys izstuodis voi koncerta apmekliešona, varbyut kina voi vīnkuorši piknika sataiseišona pi dobys – tok KŪPĀ! Uzluodēsim cyts cytu itymā rudinī ar BYUŠONU KŪPĀ!
