Rokstu sagataveja: portals lakuga.lv

Nu jau catūrtū godu piec kuortys sevkuram ir vareiba plānuot sovu kasdīnu, jemūt tolkā vīneigū plānuotuoju latgaliski “Giut breidi”. Vēļ da 10. novembra ir vareiba īsaguoduot plānuotuoju īprīškpuordūšonā.

Latgaliskais plānuotuojs “Giut breidi” pyrmū reizi ir radeits 2021. godā. Ari itūgod tuo idejis autore ir Līga Springa, grafiskuo dizainere – Liāna Merņaka, sovutīs foto autore ir portala lakuga.lv vadeituoja, fotografe i socialūs teiklu redaktore Amanda Anusāne. Plānuotuoju var pasyuteit ITE.

Kai stuosta plānuotuoja idejis autore Līga Springa, sevkurā godā plānuotuojam teik izvālāta konkreta tema, kas mudynoj tuo lītuotuojus iz puordūmom vysa gods garumā. “2025. goda plānuotuoja tēma ir svieteit dzeivi. Tys ir myusu aicynuojums pīvērst viereibu mozajom kasdīnys prīcom, nūviertēt laimeiguos šaļts i daškiert sovam laikam eipašu nūzeimi,” tai Līga Springa.

Līga ari doluos ar viesti, ka nuokušuo gods plānuotuoja dizainā ir īvīstys tehniskys i vizualys izmainis – plānuotuojs ir meikstajā siejumā i tuo dizains ir boguots ar kūšom kruosom. Plānuotuoja īšklopuos ir izveiduoti nedelis puorskoti, kas ļaun ārtuokā i strukturātuokā veidā plānuot sovus dorbus vysa gods garumā. Taipoš ir daīmami ari mieneša atvārumi, kab vysi plāni byutu puorradzami.

“Plānuotuoja dizainu ir radejuse Liāna Merņaka, kurys ūtys pīskuorīņs daškir eipašu i muokslinīcysku nūskaņu, sovpus īšklopuos ir fotografis Amandys Anusānis nūgiutuos šaļts. Gondreiž kotrs 2025. goda mieness suocās ar vuordim, teikumim i puordūmom par dzeivi, tuos svineibom i vareibu aizadūmuot par byutiskū,” stuosta Līga Springa i kūpā ar vysu plānuotuoja komandu aicynoj plānuot i svieteit 2025. godu!