Rokstu sagataveja: portals lakuga.lv

Kab nūstyprynuotu dorbā ar jaunuotni struodojūšūs psihoemocionalū stuovūkli i aizsorguotu pret izdegšonys riskim, Latvejis Jaunuotnis padūmis Latgolys viestnīceiba organizej pasuokumu “ReStarts”, kurā aicynoj pīsadaleit sevkuru jaunuotnis specialistu, lai praktizātu tehnikys i maklātu atbiļdis iz vaicuojumim kūpā ar muokslys i sistemu terapeiti Aloidu Jurčenko. Pasuokums nūtiks 29. novembrī Rēzeknē, Breiveibys īlā 40, nu 11 stuņžu reitā da 18 stuņdem vokorā.

Bolstūtīs iz bārnu, jaunuotnis i saimis atteisteibys pamatnūstuodnem 2022.-2027. godam jaunuotnis darbinīks ir persona, kas struodoj ar jaunuotni, īsaistūt jaunīšus dorba ar jaunuotni eistynuošonā i izviertiešonā; nūdrūsynoj aktivitatis i atpyutys vareibys jaunīšim vītejā leiminī; pīsadola storptautyskūs pasuokumu i projektu realiziešonā, konsultej jaunīšus par jim aktualom temom; nūdrūsynoj informacejis daīmameibu i apriti par jaunuotnis politikys vaicuojumim. Bez tuo jaunuotnis darbinīks bīži ir cylvāks, kurs snādz emocionalu atbolstu i, izmontojūt naformaluos izgleiteibys metodis, veicynoj jaunīšu dzeivis prasmu atteisteibu, īvārojūt etiskūs i moralūs principus. Partū bīži rūnās jaunuotnis darbinīku izdegšona i bīža darbinīku rotaceja itymā omotā, kam dorbs ar itū mierka grupu prosa plašu zynuošonu i prasmu spektru. Kab mozynuotu īprīšk pīsauktuos problemys, 29. novembrī Rēzeknē, Breiveibys īlā 40, nu 11 stuņdem reitā da 18 stuņdem vokorā nūtiks prevencejis nūdarbeibys jaunuotnis jūmā īsaisteitūs izdegšonai.

Muokslys i sistemu terapeite Aloida Jurčenko par tū, kū sagaideit nūdarbeibuos: “Itūšaļt vaira struodoju ar audžu saimem, aizbiļdnim i adoptātuojim, kai ari bārnim ar lelu traumatiskū pīredzi. Ari jaunuotnis darbinīkim saīt sasadūrt ar vysaidim bārnim, tymā storpā ar uzvedeibys problemom i vysaidim emocionalajim stuovūklim. Nūdarbeibuos varēs īsavuiceit īmanis, kai nūvērst izdegšonys riskus, kai apzynuot sevi i sovys stypruos pusis, kai ari mazynuot hronisku stresu i sprīdzi. Bolstūtīs sovā praktiskuo dorba pīredzē, izmontuošu vysaidys muokslys terapejā baļsteitys tehnikys i pajiemīņus, taipat struoduosim ar vaicuojumim, kas rassīs kluotīnē.”

Pasuokums ir bezmoksys i tam nav vacuma īrūbežuojuma. Programu var apsavērt i nūdarbeibom dasasaceit, aizpyldūt itū anketu: ej.uz/restartslatgale

Nūtikšona teik eistynuota projektā “Regionalūs jaunuotnis organizaceju kapacitatis styprynuošona interešu aizstuoveibys sferā (LJP 9.0)”. Projektu finaņsej Eiropys Savīneiba #NextGenerationEU i #SIF_sociālādrošība.

Publikaceju apmoksoj bīdreiba “LOBS” projektā “Regionalūs jaunuotnis organizaceju kapacitatis styprynuošona interešu aizstuoveibys sferā (LJP 9.0)”.