Rokstu sagataveja: portals lakuga.lv

Nu 1. da 8. decembra Reigā i vairuokuos cytuos vītuos Latvejā nūtiks literaturys festivals “Prozas lasījumi”, kura daļa jau vairuokus godus ir ari konkurss “Latgolys prozys skaitejumi”. Žureja ir pabeiguse īsyuteitūs konkursa dorbu viertiešonu i ir zynomi septeņu ituo gods lobuokūs dorbu autori. Catūrtdiņ, 5. decembrī, nūtiks konkursa nūslāguma pasuokums i pyrmū reizi prozys skaitejumi latgaliski skanēs Daugovpilī.

Konkurss “Latgolys prozys skaitejumi” nūteik jau pīktū reizi, juo reikuotuojs ir latgalīšu kulturys kusteiba “Volūda”, nūtikšonu eistynojūt kai daļu nu literaruos jaunradis latgaliski veicynuošonys programys. Konkursā beja aicynuoti pīsadaleit vysa vacuma Latgolys kulturtelpai pīdareigi autori, kurī roksta prozu. Itūgod tyka sajimti 19 vysaidu autoru dorbs kai latvīšu literarajā, tai latgalīšu rokstu volūdā. Īsyuteitūs dorbus viertēja žureja, kurā beja literaturzynuotnīks Valentins Lukaševičs, konkursa “Latgolys prozys skaitejumi” pārnejuo gods uzvarātuoja, literaturzynuotneica i rakstneica Ilze Sperga, gruomotu blogere Inga Gedžūne, literaturzynuotneica, rakstneica Elīna Kokareviča i žurnaliste Maruta Latkovska.

Ituo gods konkursā par lobuokajim atzeiti latgaliskuos literaturys laukā kai jau labi zynomu, tai i vēļ nacik zynomu autoru – Annelis Slišānis, Ingys Kaļvys-Mininys, Ingys Mastinis, Laurys Strodis, Lilijis Limanis, Sarmītis Trūpys i Vitys Briškys – prozys dorbi. Konkursa uzvarātuojs tiks paziņuots 5. decembrī 19 stuņdēs konkursa nūslāguma pasuokumā, kas pyrmū reizi nūtiks Daugovpilī, Daugovpiļs Vīneibys noma kopejneicā. Taipat konkursu varēs vērtīs tīšraidē, kas byus daīmam latgalīšu kulturys ziņu portalā lakuga.lv i kusteibys “Volūda” profilā socialajā teiklā “Facebook” ITE.

“Latgolys prozys skaitejumu” nūslāguma pasuokumā Daugovpiļs Vīneibys noma kopejneicā interesentim byus vareiba dzierdēt vysmoz pīcu finalistu dorbus. Nūtikšonu vadeis aktrise Kristīne Veinšteina, bet muzykali vokoru papyldynuos Amanda Lapa. Īīšona pasuokumā byus bezmoksys. Lobuokūs konkursa dorbus piečuok varēs puorskaiteit portalā lakuga.lv, bet konkursa uzvarātuojs svātdiņ, 8. decembrī, 18 stuņdēs pīsadaleis literaturys festivala “Prozas lasījumi” nūslāguma pasuokumā Reigā, Tallinys kvartalā (Tallinys īlā 10). Vaira par festivalu “Prozas lasījumi” ITE.

Konkursa žurejis puorstuove žurnaliste Maruta Latkovska, raksturojūt konkursa dorbus, soka: “Itī konkursa dorbi mani īprīcynuoja ar tematu daudzveideibu i jūs plotū amplitudu, kura pliešās nu viesturiskuos atminis mūdynuotuojis esejis par tragiskajim nūtykumim Stompaku pūrā leidz myusdīneiga laivu braucīņa atraktivam aprokstam, nu sumpurņa uzbrukumu attāluojuma myusu Latgolys senejūs aizlaikūs leidz breineigajam tauriņam zīmā pi Rēzeknis Tehnologeju akademejis kaidā sirsneigā literarajā puorsokā.” Literaturzynuotnīks Valentins Lukaševičs, kurs konkursa dorbus viertēja jau ūtru reizi, pīzeist, ka jam dorbi pasalykuši leidzeigi sovā stilistikā. “Dominej apzinis plyusma, emoceju i īguodu pīfiksiejumi. Teksti ir myusdīneigi – kai pa volūdai, tai pa problematikai,” tai Lukaševičs.

Konkursu “Latgolys prozys skaitejumi 2024” organizej latgalīšu kulturys kusteiba “Volūda” (bīdreiba “LgSC), jū atbolsta literaturys festivals “Prozas lasījumi 2024” (Latvejis Rakstnīku savīneiba), Vaļsts kulturkapitala fonds, latgalīšu kulturys ziņu portals lakuga.lv i žurnals “Domuzīme”.

Festivals “Prozas lasījumi” nūteik nu 1995. goda, tū organizej Latvejis Rakstnīku savīneiba. Laika gaitā “Prozas lasījumi” nu nalela pasuocīņa izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki. Pīktū reizi sadarbeibā ar festivalu tymā byus nūtikšonys ar Latgolys kulturtelpys autorim.

Video atsavieršona iz pārnejuo gods konkursa nūslāgumu.