Rokstu sagataveja: portals lakuga.lv

12. decembrī Daugovpiļs Vīneibys nomā Latgolys Turysma konferencē i Goda bolvu padūšonā sasatiks Latgolys i vysys Latvejis turysma nūzaris profesionali i praktiki, viestej pasuokuma organizatori.

Navaļdeibys organizaceja “Latgolys Turysma asociaceja” (LTA) jau deveitū godu piec kuortys organizej Latgolys Turysma konferenci i Goda bolvu padūšonu, itūreiz – 12. decembrī Daugovpiļs Vīneibys nomā. Tradicionali pasuokumu apmeklej turysma eksperti i plānuotuoji, kulturys nūzaris puorstuovi i turysma nūzaris uzjiemieji.

Kasgadeji turysma konferencis saturs ir gona daudzveideigs, regiona turysmu apsaverūt nu vysaiduoku aspektu. Ar regiona nūzaris puorskotu goda grīzumā īpazeistynuos LTA vaļdis prīšksādātuoja Jelena Kijaško, eisumā apsaverūt LTA goda laikā eistynuotuos marketinga aktivitatis, aktualuos turysma tendencis i prognozis 2025. godam. Sovpus par Latvejis vierīņa turysma aktivitatem viesteis Latvejis investiceju i atteisteibys agenturys Turysma departamenta vadeituoja Inese Šīrava.

Kai pasaulī, tai i Latvejā radzams, ka kūpīnys pavysam nūteikti var palikt par turysma vierzietuojspāku, taišni deļtam itūgod organizatori aicynuojuši “Latvijas Lauku foruma” programu vadeituoju Zani Seredinu pasadaleit juos pīredzē par kūpīnu nūzeimi regionaluo turysma pīduovuojuma veiduošonā, apsaverūt Latvejis i uorvaļstu pīmārus.

Taipoš organizatori pastreipoj, ka militarais montuojums kai atsevišks turysma vierzīņs pādejūs godu laikā ir palics eistyn aktuals i pīpraseits. Deļtam LTA ir īsasaistejuse vierīneigā Latvejis lauku turysma asociacejis “Lauku ceļotājs” projektā “Militarais montuojums II”, sovpus konferencē “Lauku ceļotāja” puorstuovs Juris Smalinskis izstuosteis par projekta golvonajim mierkim i tū, deļkam ir svareigi izveiduot vīnuotu Baļtejis mārūga militaruo montuojuma turysma pīduovuojumu.

Sovpus mārketinga eksperts Raimonds Platacs Latgolys turysma nūzari apsavērs caur tuos “spāka punktim”, raugūt atškatynuot, kas i kaids ir Latgolys magnetismys.

Konferencis nūslāgumā paradzāta paneļdiskuseja, kurū vadeis turysma i kulturys eksperte i Rēzeknis nūvoda Lūznovys muižys puorvaļdneica Iveta Balčūne. Diskusejis “Nu stuosta da pīredzei – kai padareit Latgolu par atpazeistamu turysma golamierki” laikā tiks runuots par tū, kai Latgolu padareit par konkurētvareigu i atpazeistamu turysma golamierki.

Sovpus dīnys nūslāgumā tiks pasnāgtys Latgolys Turysma goda bolvys 2024. Itūgod goda bolvu autors ir Preiļu nūvoda keramiks Raivo Čerņavskis. Kūpumā tyka sajimti 69 pretendentu dasacejumi, nu tūs iz ūtrū viertiešonys kuortu izvierzeiti 27 uzjāmumi voi turysma objekti, sovpus goda bolvu sajims deveni lobuokī nūzaris puorstuovi.

Pylna pasuokuma programa daīmama ITE, sovpus vēļ 10. decembra sevkurs interesents var registrētīs konferencis apmekliejumam ITE.