Rokstu sagataveja: portals lakuga.lv

Latgolys Turysma asociaceja jau deveitū godu piec kuortys organizēja Latgolys Turysma goda bolvys padūšonu. Tuos mierkis ir veicynuot Latgolys turysma pīduovuojuma i kvalitatis uzalobuošonu, taipoš ari izceļt i apbolvuot Latgolys regiona lobuokūs turysma nūzaris puorstuovus. Itūgod goda bolva padūta deveņuos nominacejuos, viestej Latgolys Turysma asociacejis (LTA) sagataveituo informaceja.

LTA ari pastreipoj, ka itūgod Latgolys Turysma goda bolvai tyka sajimts eipaši lels dasacejumu skaits – kūpā 69 pretendenti nu vysa Latgolys regiona. Goda bolvai ir devenis nominacejis i jau ūtrū godu piec kuortys divejuos nu tūs teik nūškierts privatais i pošvaļdeibu sektors, kab naradeit navīnleidzeigu konkurenci. Itūgod bolvys tyka padūtys Daugovpiļs Vīneibys nomā 12. decembrī. Goda bolvu dizainu kotrā reizē veidoj cyts meistars, par pamatu izmontojūt muolu i kūku, kai ari integrejūt LTA 2019. godā izstruoduotuo zeimyna logo. Itūgod bolvys autors ir Preiļu nūvoda keramiks Raivo Čerņavskis.

Kai īrosts, vysus pretendentus viertēja kompetenta žureja, kuruos sastuovā itūgod beja: Latvejis Investiceju i atteisteibys agenturys Turysma departamenta vacuokuo projektu vadeituoja Kristīne Mickāne, Latgolys Turysma asociacejis turysma koordinatore Laura Spundere i ziņu portala “Baltic Travelnews” direktors Aivars Mackevičs. “Itūgod vysuos nominacejuos beja vairuoki spieceigi pretendenti, deļtam izviertiešona pavysam nabeja vīglys aizdavums, tok bolvys sajiemieji ir eistyn izcylys turysma vītys, kuruos pavysam nūteikti īsaceitu kotram pagaisteit,” stuosta LTA turysma koordinatore Laura Spundere.

• Turysma profesionaļs – Tatjana Kozačuka Kruoslovys nūvoda turysma informacejis centra vadeituoja;
• Lobuokuo turysma mītne piļsātā – “Villa Fortuna” Ludzys nūvodā;
• Lobuokuo turysma mītne laukūs – atpyutys komplekss “Avotiņš” Leivuona nūvodā;
• Lobuokais jaunais turysma objekts privatajā sektorā – Ārdavys/Jezufinovys muiža Preiļu nūvodā;
• Lobuokais jaunais turysma objekts pošvaļdeibu vydā – Preiļu muižys komplekss i parks;
• Lobuokais turysma objekts privatajā sektorā – IK “Kolnasāta” – ols dareituojs Daiņs Raksteņš;
• Lobuokais turysma objekts pošvaļdeibu vydā – Latgolys kulinaruo montuojuma centrs “Šmakovka”;
• Goda turysma uzjiemiejs – kopeja grauzdātova i kulturvīta “KUUP Coffee”.

Sovpus nominaceju “Turysma izcileiba 2024” itūreiz sajēme vīna nu bīdreibys “Latgolys Turysma asociaceja” aizsuocieju – Ludzys nūvoda turysma informacejis centra vadeituoja i Ludzys amatnīku centra leidzdybynuotuoja Līga Kondrāte. Līga ir turysma izcileiba caur godu godim, jei ir īguļdejuse miļzeigu dorbu Latgolys turysma atteisteibā nu pošu pyrmsuokumu. Kolegi Līgu raksturoj kai cylvāku, kas ir pylna ar degsmi i naizseikstūšu energeju, jei ir eistyna sova nūvoda i regiona patriote, kas ar lelu naatlaideibu i ryupem sagloboj myusu seņču vierteibys, omotus i tradicejis. Līga ir cylvāks, kuram nav vīnolga, kuram ryup kotrys mozais uzjiemiejs, vysys Latgolys i ari Latvejis turysma nūzaris atteisteiba. Cauri godim daudzi ļauds Latgolys turysmu asociej taišni ar Līgu.

Par Latgolys Turysma goda bolvu

Turysma goda bolvys pretendentu dasaceišona kasgadeji teik oficiali izziņuota aptyvai mienesi pyrma bolvys padūšonys. Pretendentu dasaceišona ir veids, kai izceļt tuos turysma vītys i puorstuovus, kuri sovā pakolpuojumā voi produktā īnasuši inovacejis, byutyskai papyldynuojuši asūšū pīduovuojumu voi vīnkuorši pamatuši vyspalīkūšuokū pozitivū īspaidu. Dasaceit pretendentus teik aicynuoti uzjāmumi, privatpersonys, pošvaļdeibu puorstuovi i.c.

Foto galereja: Latgolys Turysma goda bolvys padūšona 2024, LTA arhivs.