Rokstu sagataveja: portals lakuga.lv

Jau vairuokus godus ar Latgolys kulturys programys paleigu Latgolys regionaluo televizeja gatavej video stuostus – sižetus i raidejumus – ap Latgolys kulturā eistynuotajim projektim. Itūgod televizeja sagatavejuse deveņus video stuostus i divejus raidejumus latgaliski.

Kai viestej Latgolys regionaluos televizejis (LRT) informaceja, viests ap Latgolys kulturys nūtikšonom i eistynuotajim projektim Latgolys kulturys programā nu 2024. gods maja gola skaniejušys LRT gataveitajūs ziņu raidejumūs “Runoj Latgola”, “Regionaluos televizejis pīduovoj” i “Pīci nūvodi Latvejā” kanalūs TV24 i ReTV – kūpā sagataveiti deveni sižeti, kas golā apkūpuoti ari divejūs raidejumūs “Runoj Latgola”. Itaidu stuostu mierkis ir popularizēt goda laikā Latgolys kulturā reikuotuos nūtikšonys, radeitūs dorbus i izdavumus.

Pyrmais stuosts pavasarī izskanēja par muzykantu saīšonu Rogovkā – večerinku “O’ bļaka!”, bet piečuok viesteits kai par laikmateiguos muokslys rezideņcem “Leons, Lūcija un es” Ludzys nūvodā, tautystārpu fotoprojektu “Piecgarša”, muokslinīka Valda Buša symtgadei veļteitū pleneru i izstuodi Viļakā, sarunom par Lubuona azaru i juo apleicīni, latgaliskū jaunīšu seminaru “Atzolys” Dagdā, Fraņčam Trasunam veļteitū paseju, kruosojamū gruomotu ap Latgolys turysma objektim i Skryndu dzymtys muzejā Vabalē sagataveitū dorba burtneicu. Vysus stuostus var nūsavērt ITE.

Latgolys regionaluos televizejis sižeti i raidejumi sagataveiti “Latgolys kulturys programys 2024” projektā “Latgolys kultura = identitate, volūda, jaunrade TV ekranā VI”. Atguodynuosim, ka “Latgolys kulturys programu” Vaļsts kulturkapitala fonda mierkprogramā “Latvīšu viesturyskūs zemu atteisteibys programa” eistynoj Latgolys regiona atteisteibys agentura. Itūgod programys konkursā tyka īsnāgti 127 projekti, bet atbolstu dabuoja viņ puse – 65 projekti ar kūpejū finansiejumu 167 400 eiro.