Rokstu sagataveja: portals lakuga.lv

Pārnejuo gods golā Reigā nūtyka breivpruoteigūs gūdynuošonys pasuokums “Goda breivpruoteigais 2024”. Apbolvuojumam beja dasaceiti vaira nakai 70 breivpruoteigūs i breivpruoteiguo dorba organizatoru nu vysys Latvejis, bet deveni nu jūs sajēme gūda zeimis. Jūs vydā ari Lūznovys muižys breivpruoteiguo Ligita Stikute, kurei sagatavejuse ituos nedelis īsacejumus. Sarunu ar Ligitu var nūsaklauseit raidejumā “Latgolys stuņde” ITE.

Ligita Stikute, pīduovojūt nūtikšonu izlasi, pīzeist, ka tai kai poša saisteita ar Lūznovys muižu, tod īsacejumūs byus taišni koč kas nu muižys pīduovuojuma. “Itūgod muiža īīs dasmytajā darbeibys godā, turpynojūt pīduovuot interesantys sasatikšonys vysaiduos nūtikšonuos i koncertūs,” soka Ligita.

Latgolys muokslineicu kvartets

Itūnedeļ atbraukt gostūs iz Lūznovys muižu nūteikti ir vārts svātdiņ, 19. janvarī, kod divejuos stuņdēs pa dīnu byus muokslineicu apvīneibys “V.I.V.A.” izstuodis “Rakstīt uz baltas sienas mēnešus” atkluošona. Apvīneibā nu 2006. gods dorbojās četrys Latgolys gleznuotuojis – Vēsma Ušpele, Ilze Griezāne, Vija Stupāne i Agra Ritiņa. Apvīneibys nūsaukums sataiseits nu muokslineicu vuordu pyrmūs burtu i tulkuojumā nu latiņu volūdys zeimojūt “Lai dzeivoj!”, kas truopeigi raksturoj rodūšuo kvarteta dorba rezultatu. Itei nabyus pyrmuo reize, kod muokslineicu izstuode byus apsaverama Lūznovys muižā, ari īprīškejuo izstuode maņ cīši patyka, leidza ar tū prīcojūs, ka vēļreiz byus vareiba redzēt breineigūs muokslineicu jaunūs gleznu izstuodi. Izstuodis atkluošona ir bezmoksys.

Taipat itūnedeļ īsoku aiz laika pasaryupēt par cytom nūtikšonom, kū varēs pīdzeivuot muižā – 26. janvarī 14 stuņdēs gaidoma izklaidejūša erudicejis spēle komandom “Prātu mežģis Latgalē”, kurai var pīsasaceit, rokstūt iz e-postu pratumezgis@gmail.com (komandā da pīcu dalinīku, pīsadaleišonys moksa 25 eiro nu komandys), voi ari nūpierkt beletus iz otkonsasatikšonu ar breineigū klavesinisti Ievu Salieti, kurei 23. februarī uzastuos muižā ar sovu jaunū koncertprogramu “Uz gaismu”.

Napalaist garum “Straumi”

Itūnedeļ varu īsaceit nūsavērt jau vysā pasaulī pazeistamū, tikū “Zalta globusu” sajāmušū animacejis kinu “Straume”, kurū taišni itamā nedeļā otkon var nūsavērt Latgolys viestnīceibys “Gors” kinuteatrī. Seansi paradzāti 17. janvarī 17 stuņdēs, kai ari sastdiņ, 18. janvarī, 12.30 stuņdēs. Poša “Straumi” asu redziejuse jau divejis reizis. Kod nūsavieru pyrmū reizi, jau zynuoju, ka gribiešu nūsavērt vēļreiz iz leluoka ekrana, kū kūpā ar draugim ari eistynuoju pārnejuo gods golā “Gora” kinuteatrī. Cikom ir taida vareiba i animacejis kinu ruoda, nūteikti īsoktu tū nūsavērt!

Vokors ar sportiskom aktivitatem

Itamā nedeļā vēļ varu īsaceit breivuo laika aktivitati Lūznovā – pīktdīnis, 17. janvara, septeņuos stuņdēs vokora aktivuos atpyutys centrys “Zelta zvīņa” (Piļs īla 2, Lūznova) reikoj novusa turniru i tī, kurī grib pavadeit jauku vokoru sportiskuos aktivitatēs, var pīsasaceit i pīsavīnuot!

Taipat gribīs atguodynuot, ka iz Lūznovys muižu var braukt gostūs sevkurā dīnā (izjamūt pyrmūdīnis) – nasasteidzūt apsavērt kai pošu muižu, pastuoveigū izstuodi “Kerbedzs: sekojot inženiertehniskajām idejām”, atīt iz Turysma informacejis centru, kur var izzynuot vaira par ceļuojumu golamierkim i vareibom Latgolā, nūbaudeit kopeja, nūpierkt kaidu vītejū suveniru. Taipat lobā laikā vysod var pasastaigot pa parku i nūīt da stadiona, kur var īpasazeit ar “Sajiutu duorza” labirintu. Lūznovys muižā gaideits kotrys apmaklātuojs – muižys pyrmais stuovs i cokolstuovs ir pīmāruoti cylvākim ar kusteibu trauciejumim, kas eipaši prīcynoj ari mani pošu.