Rokstu sagataveja: portals lakuga.lv

Latgolys regionaluo televizeja (LRT) turpynoj raidejumu cyklu “Skolām (ne)būt!”. Trešū tuo raidejumu par nazkodejū Upītis pamatškolu Bolvu nūvodā kanalā TV24 i Re:TV vierszemis apraidē varēs redzēt jau 15. i 17. februarī.

Raidejumu cykla “Skolām (ne)būt!” trešajā raidejumā LRT gasteis pi Upītis kulturtelpys puorstuovim Bolvu nūvodā, kas pošu spākim sagloboj i uztur nazkodejuos Upītis pamatškolys telpys. Škola nu jau septeņus godus ir slāgta, tok tuos telpuos īreikuota izalauzšonys ustoba, skaņu īrokstu studeja, tautys tārpu darbneica i pamozam īsakuortoj ari captuve. Upītis cīms ir nūzeimeigs Zīmeļlatgolys namaterialuos kulturys saglobuošonys centrys, i tuo svareiguokais vierzeituojspāks Andris Slišāns guodoj par rodūšu ideju i projektu eistynuošonu. Raidejums gasteis ari tradicionalajā pasuokumā “Ontona dīnas ļustes”, kod Upītē muzicej i rūtalis izspielej vysaidu folklorys kūpu bārni i jaunīši.

Projekts “Skolām (ne)būt!” viesteis par septeņom dažaidom izgleiteibys īstuodem Latgolā i tūs liktini kai laukūs i piļsātvidē, tai Latgolys regiona vidīnē i pīrūbeža teritorejuos. Raidejuma veiduotuoji brauks iz školom, kas ir jau slāgtys īprīšk i niu tūs telpys ir tukšys voi ari turpynoj darbeibu cytā veidūlā, kai ari apmeklēs tuos vuiceibu īstuodis, kam optimizacejis planu deļ itūšaļt draud sliegšona voi izgleiteibys pakuopis samazynuošona. Piļsātu školuos raidejums analizēs tūs gataveibu uzjimt vēļ leluoku školānu skaitu klasēs, īsavērs, kai atsateista puorīšona iz vuiceibom latvīšu volūdā vītuos, kur da šam beja ari krīvvolūdeigūs plyusma.

Raidejumu cykla “Skolām (ne)būt!” vysi septeni raidejumi, suocūt ar 1. februari, da 15. marta tiks puorraideiti kotru sastdīni 16.00 stuņdēs kanalā TV24 i pyrmūdīnēs 17.30 stuņdēs kanala Re:TV vierszemis apraidē Latgolys regionalajā televizejā. Taipat kotram raidejumam sekuos atkuortuojumi kanalā TV24 svātdīnēs 14.30 stuņdēs i ūtardīnēs kanala Re:TV vierszemis apraidē Latgolys regionalajā televizejā 7.00 stuņdēs.

Piec kotra raidejuma puorraidis televizejā tūs varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Atbreivuošonys aleja 98, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz tel. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Skolām (ne)būt!” saturu atbiļd SIA “Latgales reģionālā televīzija”. #SIF_MAF2024

Publikaceju apmoksoj Latgolys regionaluo televizeja