18. augustā Daugovpiļs nūvoda Višķu pogosts svieteis pogosta svātkus, kurūs vīna nu eipašajom nūtikšonom byus rekonstruātuos estradis atkluošona.

Pogosta svātku nūtikšonys suoksīs 12:00 ar mišu Višķu Ruomys katuoļu bazneicā. 14:00 Višķu profesionaluos vydsškolys zalā byus vareiba nūsavērt Daugovpiļs teatra izruodi A. Čehova „Byldynuojums”, nu piec izruodis tīpat školys muzeja ustobuos varēs apsavērt ekspoziceju i interešu kūpa „Dzeiveite” ruodeis sadzeivis ainenis „Tai mes Višķūs dzeivojam”. 15:00 estradis teritorejā suoksīs amatnīku i ražuotuoju tierdzeņš, sporta aktivitatis i radūšuos darbneicys. Vokorā – 19:00 ar dančim i dzīsmem tiks paraudzeita jaunuo estrade atkluošonys koncertā „Vysu dīnu saule tak”, kurā pīsadaleis vaira kai 20 amatermuokslys kolektivi – kori, tautys dzigu kolektivi, vokalī ansambli, solisti i c. kolektivi nu Višķu pogosta i cytim Daugovpiļs nūvoda pogostim. Koncertu kuplynuos ari gosti nu Lītovys – Suveiku tautys noma muzykys kapela „Cinkelis” i folklorys kūpa „Čičeris”. Eipašī koncerta gosti – Liene Šomase i Daiņs Skuteļs. Koncertu vadeis Daugovpiļs teatra akteri. Piec koncerta 22:00 iz zaļumbalu aicynuos grupa „Patrioti.lg” i DJ Gatis.

Estrade Višķu pogostā izcalta 1969. godā i vysu itūs godu garumā kapitalīguļdejumi estradis rekonstrukcejai natyka dareiti. 2011. godā Daugovpiļs nūvoda pošvaļdeiba izsuoka projekta Nr. 10-03-L32100-000276 „Daugovpiļs nūvoda estradis rekonstrukceja Višķu pogostā” realizaceju, kura mierkis beja padareit Višķu estradis rekonstrukceju, kab izlobuotu pošvaļdeibys infrastrukturu i paaugstynuotu kulturys objekta dūtū pakolpuojumu konkurēstspieju. Niu estradē paradzātys 1080 skateituoju sādvītu i 600 koristu vītu iz kora podastim.

Daugovpiļs nūvoda dūme car, ka Višķu estradei atsagrīzs sovulaik tik popularuo kulturys objekta statuss i otkon ite iz kūpeigim svātkim sasapuļcēs kori, dzigu kolektivi, folklorys ansambli, muziki, teatra spālātuoji, amatnīki i skateituoji.