9.septembrī 11.00 Daugovpiļs teatrī nūtiks Tāva dīnys pasuokums „Es un mans paps”.

Jau catūrtū godu Latvejā septembra ūtruo svātdine teik svieteita kai Tāva dīna. Idejis autori soka, ka ar itū dīnu mes pasokom paļdis atbiļdeigajim i meilajim tāvim, partū ka jī ir.

Pasuokumā paradzātys aktivitatis vysai saimei – mamys ar bārnim varēs izzeimēt sovus tāvus i apsavērt ari cytu dorbus, kas tiks izvītuoti nalelā izstuodē, tāvi ar bārnim – pīsadaleit vysaiduos stafetēs i veikleibys puorbaudiejumūs. Sovukuort pošim mozuokajim byus īspieja klausētīs puosokys i stuostus Pūķa olā.

Saimem ari tiks pīduovuota ekskurseja pa teatri, kur drūsmeiguokī varēs pat īpasazeit ar tī dzeivojūšū spūceņu.

Pasuokuma laikā byus īspieja nūpierkt biletus iz Daugovpiļs teatra septembra i oktobra izruodem par eipašom cenom – 20% atlaide iz vysom izruodem (naskaitūt pyrmizruodis). Taipat ari pīaugušais, pierkūt vysmoz vīnu biletu iz kaidu nu bārnu izruodem, vēļ vīnu varēs sajimt par breivu.

Atguodynojam, ka ari itymā jaunajā teatra sezonā Daugovpiļs teatrī byus apsaveramys divejis izruodis latgaliski – M. Zeilis „Rūžys byudu golūs”  i K. Jokstis „Klepernīku pogosta zvaigzne”, kai ari gaidomys jaunys pyrmizruodis.