Gleznuotuoju profesoru Arvīdu Egli (1905–1977) riezeknīši pamatuotai vys vēļ skaita par sovejū, kam ar Rēzekni ir saisteiti gondreiž 30 trauksmainuokī juo myuža godi (1915–1944). Tok sovys vosorys nu 1958. gods leidz pat myuža nūslāgumam muokslinīks ir pavadejs Salacgreivā, kur vadejs Latvejis Vaļsts muokslys akademejis studentu praksis i ari pats nūsadevs gleznīceibai. Gleznuojis apleicīnis ainovys i cylvākus, eipaši tyva jam ir bejuse zvejnīku ūstys tema i bolku pludynuotuoji. Latgolys Kulturviesturis muzeja kruojumā ir vaira par 20 Salacgreivys apleicīnē gleznuotu dorbu. Pīmynūt A. Eglis 120. dzeivis jubileju, LKM aicynoj apmaklātuojus īsavērt izcyluo vacmeistara muokslā, īgrimt tik jam rakstureigā dyumakainā kolorita atmosferā.