Daugovpiļs piļsātys svātki
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”.
Treis dīnu garumā byus vareiba baudeit vysaidys koncertprogramys, izzynuot jaunumus turysma i izgleiteibys pīduovuojumūs, izaklaidēt pīpyušamajuos atrakcejuos i izgaršuot gordumus uora kopejneicuos, nūpierkt amatnīku i sātys ražuotuoju darynuojumus tradicionalajā tierdzeņā, pīsadaleit kruošņajā svātku guojīnī, vērtīs salutu i just leidza sportistu aktivitatem.
Itūgod svātkūs dorbuosīs 4 uora skotivis, iz kurūs varēs izbaudeit vysaidus žanrus i stylus vaira nakai 200 muzykalūs i vokalūs ansambļu, deju kolektivu i solistu izpiļdejumā. Tai kai A. Pumpura skverā itūreiz byus izvītuotys kopejneicys i vysaidi pīduovuojumi garšu baudeituojim, tod iz ituos skotivis vaira skanēs atpyutai i parkam pīmāruota muzyka. Dubrovina parkā i iz tuos skotivis itūreiz vaļdeis bārni, kurim ar eipašu programu tiks pīduovuota vareiba sastdiņ svieteit ari Storptautyskū Bārnu aizsardzeibys dīnu. Mihoelsa i Reigys īlys krystceļūs iz skotivis sovus skateituojus gaideis deju grupys i zumbys maratons, vokaluos studejis, solisti i ansambli. Sovpus golvonuo svātku skotive Vīneibys laukumā tiks uztycāta svātku eipašajim gostim: pīktdiņ grupom „Raxtu Raxti” i „DaGamba”, sastdiņ – grupai „A-Europa” i ukraiņu estradis zvaigznei Loboda.
Vīna nu kruošņuokūs piļsātys svātku nūtikšonu ir svātku guojīņs i tuo kulminaceja – atkluošonys koncerts. Ituo gods koncertā „Pilsētai Daugavas krastā” uzastuos orkestri „Daugavpils Sinfonietta” i pyutieju orkestris „Daugava”, vokaluo studeja „Pērlītes”, solisti Ilona Bagele, Lidija Breska, Iveta Ustinskova, Maksis Krilovs i Sandis Ulpe.
Daudzveideigū piļsātys svātku programu itūgod papyldynuos ari vēļ nabejuši jaunumi. Gimnazejis īlys pūsmā pi Vīneibys noma byus atkluota Turysma īla, kurā divejis dīnys varēs īpasazeit ar Latvejis i Leitovys turysma informacejis centrim i uzjāmumu aktualuokajim turysma sezonys pīduovuojumim. Pyrmū reizi piļsātys svātkūs byus vareiba apsavērt sporta mašynu paruodi, kai ari eipašus puorsteigumus sovā 20 godu jubilejā ir sagatavejs tierdznīceibys centrs „SOLO”.
Kai jau īrosts – trešajā svātku dīnā muzykalajom i izklaidis aktivitatem Dubrovina parkā, A. Pumpura skverā i Reigys īlā pīsavīnoj ari sportiskuos aktivitatis: Vīneibys laukumā nūtiks atkluotais čempionats spākaveirim, bet sūpluok Olimpiskajam centram nūtiks Sporta i jaunuotnis festivals. Sovpus Daugovpiļs cītūksnī sovu eipašū programu pīduovoj Inžineru arsenala darbinīku komanda, Krāmu tierga reikuotuoji i Daugovpiļs cītūkšņa Kulturys i informacejis centrs.