Daugovpiļs Universitatis Humanitaruos fakultatis Zynuotnyskī skaitejumi
26.–27. janvarī Daugovpiļs Universitatis Humanitarajā fakultatē (DU HF) nūtiks kasgadejuo storptautyskuo zynuotnyskuo konference XXXIII Zynuotnyskī skaitejumi. Konferencis fokuss ir DU puorstuovātuos humanitarūs zynuotņu jūmys – saleidzynojamuo literaturzynuotne, sastotamuo volūdnīceiba, tulkuojumzynuotne, regionalistika, mutvuordu viesturis pietejumi, kulturys studejis i cyti.
Kotru godu konferencē pīsadola īvārojams skaits pasaulī atzeitu autoritativu i jaunūs pietnīku nu Latvejis i uorvaļstim. XXXIII Zynuotnyskajūs skaitejumūs uzastuos 145 referenti nu Lelbritanejis, ASV, Čehejis, Igaunejis, Italejis, Izraelys, Kazahstanys, Latvejis, Leitovys, Pūlejis, Slovakejis, Ukrainys i Vuocejis. Itūgod konference nūteik hibridformā (kluotīnē DU telpuos i tīšsaistē ZOOM platformā).
HF XXXIII Zynuotnyskūs skaitejumu plenarsēde tiks veļteita Ukrainys tematikai.
Konference nūtiks septeņuos dorba grupuos: Angļu volūda: sinhroneja i diahroneja; Baltu volūdys: sinhroneja i diahroneja; Slāvu volūdys viesturis i kulturys kontekstā; Myusu dīnu pietejumi translatologejā; Cylvāks i pasauļs literaturā i kulturā; Literatura i kultura: process, mejīdarbeiba, problemys; Viesture: olūti i cylvāki.
Kasgadejuo storptautyskuo konference teik reikuota nu 1991. gods janvara, partū tuos organizātuoji i dalinīki tū sauc ari par Janvara skaitejumim. Konferencis idejis inspirātuoji ir DU HF emeritātais profesors, Dr. habil. philol., LZA korespondātuojlūceklis Fjodors Fjodorovs (1939–2020) i profesors Joels Veinbergs (1922–2011).