Grupys “Galaktika” albuma prezentacejis koncerts
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu kulturys nomūs i koncertzālēs. Obejim grupys dybynuotuojim – solistam Normundam Zušam i tausteņinstrumentalistam Vitoldam Gornevam – pīsavīnuos pavodūšuo grupa “Crazy Daisy”, kurā muzicej Raitis Keišs (bass), Gatis Ivans (gitaras), Mikus Rullis (bungys), Haralds Stenclavs (tausteņinstrumenti).
Grupys daleibnīki soka: “2019. godā tyka plānuots izdūt trešū studejis albumu i ar prīceigu sirdi dūtīs pi jiusu, tok tod, izīmūt leluos dižkibelis godim, vyss apsaruove i palyka naizdzīduotys i naizklauseitys dzīsmis… Partū itūšaļt mes īmam pi jiusu ar jaunu albumu i Vyslatvejis koncerttūri “Mums pieder tik daudz”. Tei ir prīcys šaļts, jo otkon varim byut kūpā, varim vīns ūtram snēgt lobys emocejis – kai ar jaunom dzīsmem, tai – pats golvonais – byušonu sūpluok. Albumā īkļautys kai pyrma pandemejis laika radeituos, tai klauseituoju jau īmīļuotuos dzīsmis “Lai mīlestības nepietrūkst”, “Lai put pa gaisu”, “Vasara Tevī” i cytys. Asam ari ražeigai pastruoduojuši, kab varātu jius puorsteigt ar jaunumim, i tūs byus daudz! Jums, skateituoji, asam saryupiejuši ari eipaši pateikamus puorsteigumus, i kotru sasatikšonys šaļti drūsai varēs saukt par lelkoncertu, jo kūpā ar mums iz skotivis byus ari kaids nu jiusu. Vysys koncerttūris laikā dzeivu i kvalitativu skaniejumu paleidzēs nūdrūsynuot myusu draugi – grupa “Crazy Daisy”.”
Popularū grupu “Galaktika” dybynuoja diveji talanteigi muziki – Normunds Zušs i Vitolds Gornevs. Normunds Zušs ir muzykys školuotuojs, vadejs vairuokus korus. Nu jau vairuokus godu Normunda bolss skaņ ari Latvejis Radejis 2 ēterā, jis voda ari popularū raidejumu “Latvijas sirdsdziesma”, sovpus paguojušuo gods golā Normunds suoce jaunu muzykalu projektu “Aiz horizonta”, kurā pīsadola juo draugs i radejis kolegis Kaspars Markševics i Līpuojis teatra dzīdūšais akters i autosportists Viktors Ellers.
