Izstuode “Rotko atspulgi” giun Marka Rotko abstraktuo ekspresionisma atbolsus myusu dīnu muokslā. Eksponātī dorbi radeiti, šudiņdīnys autorim īsadvasmojūt legendaruo muokslinīka dailradē. Dorbu izlase atkluoj, kai Rotko klasiskuo perioda kruosu laukumu kompozicejis, kurūs atškireibys zeime ir spieja raiseit spieceigu emocionalu puordzeivuojumu, turpynoj rezonēt 21. godu symta muokslinīku rodūšajūs mekliejumūs.

Izstuodē apsaverami vaira nakai 20 autoru dorbi gleznīceibys i grafikys medejūs nu Rotko muzeja kolekcejis. Tūs veiduojuši muokslinīki nu Latvejis, Leitovys, Igaunejis, Vuocejis, Pūlejis, Nēderlandis. Lelbritanejis, Grīkejis, ASV, Australejis i Taivanys. Puorstuovātī autori pīduovoj šudineigys interpretacejis par Marka Rotko muokslinīcyskū volūdu, pīsavieršūt taidom puorlaiceigom i universalom temom kai kruosu psihologeja, goreigums, cylvāka eksistence i attīceibys ar pasauli.

“Rotko atspulgi” nav tik veļtejums 20. godu symta muokslys geneja rodūšajam montuojumam i juo radeituo gleznīceibys styla palīkūšajai ītekmei. Tys ir aicynuojums iz dialogu par abstraktuo ekspresionisma aktualitati i spieju uzrunuot skateituoju šudiņdīnys trauksmainajā i stimulim puorsuotynuotajā pasaulī.