Izstuodis “Juoņs nu Dzeņagola” atkluošona
Izstuode byus veļteita muokslinīkam i literatam Juoņam Trūpam (1924-1989), pīmynūt jū symtgadē. Koč i sovys dzeivis leluokū daļu J. Trūps ir pavadejs trymdā, dzeivuodams ASV natuoli nu golvyspiļsātys Vašingtonys, vystik vysu sovu rodūšū darbeibu, breivū laiku i leidzekļus ir veļtejs dzymtajai Latgolai, tuos volūdai, literaturai i viesturei. Jis ir dzims Dzeņagolā, natuoli nu Drycānu, kur vys vēļ, dzymtys piecteču apsaiminīkuota, ir juo dzymtuo sāta “Lejīši”. Sadarbeibā ar viesturnīkim i J. Trūpa radinīkim Silviju i Juoni Laizānim tiks veiduota tematiska izstuode, paruodūt i juo literarū i izdeviejdarbeibu, i ilustratora i grafika veikumu, kai ari īdzeivynojūt izcyluo latgalīša pīmiņu myusu dīnu sabīdreibā. Izstuodē byus apsaverami materiali nu privatūs arhivu i nu Latgolys Kulturviesturis muzeja kruojuma.