Ituo gods 9. novembrī 18.00 stuņdēs vokora Latgolys viestnīceibā “Gors” tiks ruodeita koncertizruode “Putāns. Toreiz un Tagad”, kurā 20. godu symta latgalīšu dzejnīka Seimaņa Putāna dumpeigais gors tiks īdzeivynuots myuslaiku hip-hopa apdarē, pīsadolūt taidim muokslinīki kai Ūga, ansis i Gustavo. Par pasuokuma režisiešonu i dzejis dekmaliešonys variacejom byus atbiļdeigs akters i komikis Juoņs Skuteļs, kurs koncertizruodei ir izalasejs pseidonimu Dekšuorīts. Piec koncertizruodis tiks prezentāta ari Putāna dzejis gruomota i jaunradeitūs skaņdorbu īrokstu vinila plate informej nūtikšonys reikuotuoji.

Koncertizruodis gosti varēs pīdzeivuot Seimaņa Putāna (1892–1969) dzejis myusdīneiguos interpretacejis kai latgalīšu volūdā, kas ir dzejis originalvolūda, tai ari latvīšu volūdys atdzejuojumūs. Latgolys dzejnīka Putāna (par kurū vaira var izzynuot ITE), ar legendom apveituo i vysod pret sistemu īmūšuo, dzeja tiks paruodeita jaunā skaniejumā – gaišā, provokativā i teišā. Paguotnis dumpeigais gors saplyuss ar myusu dīnom.

Koncertizruodis “Putāns. Toreiz un Tagad” rodūšuo vadeituoja ir latgalīšu repere i “Ausmeņa Records” puorstuove Ūga aba Daiga Barkāne. Muzykaluo pavadejuma veiduotuojs ir Nikita Grapp (“Ausmeņa Records”). Izruožu taiseišonā pīsadola i iz skotivis kuops Latvejā labi zynomī reperi ansis i Gustavo. Iz prīšknasumim ir aicynuoti ari vairuoki jaunuos paaudzis Latgolā īmeiļuoti, urbanuos muzykys muokslinīki, kas dūs autentisku sajiutu i skaniejumu. Par koncertizruodis režeju pasaryupejs Juoņs Skuteļs (Jānis Skutelis) aba Dekšuorīts, kurs itū pseidonimu izalasejs par gūdu sovom latgaliskajom saknem.

“Eisumā tai – koncertizruode nūtiks treislaiceigi.” Pyrmais laiks ir “Putāns tūreiz” – ar tradicionalū dzejis skaiteišonu. Ūtrais ir “Putāns tagad” – ar dzejis apdari hip-hopa žanrā. Sovpus trešais ir tys, kas teik radeits, apvīnojūt pyrmūs divejus. Tycu, ka kotram skateituojam rezultats var byut atškireigs,” soka Juoņs Skuteļs.

Koncertizvaduma producenti ir Margers Zeitmanis i Leigatnis rodūšuo kvartala “Zeit” komanda. Projekta iniciativa baļsteita juos producentu radnīceigajuos saknēs ar pošu dzejnīku Seimani Putānu, partū iz skotivis ar sova vacvacvactāva dzejūļa izpiļdejumu myusdīneigā apdarē kuops ari DJ Straume (Arnolds Zeitmanis).

Paraleli koncertizruodis sagataveišonai nūteik dorbs pi Seimaņa Putāna atrostūs dzejūļu kruojuma, kas tiks izdūts gruomotā, kai ari dorbs studejā pi jaunizveiduotūs skaņdorbu īrokstim ar Putāna dzejis fragmentim. Īroksta piecapstruodi taisa skaņu režisors Sergejs Laletins. Piec koncertizruodis planavuoti savuoktūs dorbu gruomotys attaiseišonys svātki, kai ari jaunizveiduotūs kompoziceju vinila platis prezentaceja. Beletus iz nūtikšonu Rēzeknē 9. novembrī var nūpierkt ITE.

“Ar lapnumu varu saceit, ka ar kūpegim spākim Seimaņa Putāna dzejai asam davuši jaunu elpu, rodūt piļneigi svaigys kompozicejis, kas cīši dreiži tiks da klauseituoju ari īroksta formatā. Lepojūs par Latgolu, kurai ir sova pērle. Dzejnīks ar sovu attīksmi pret lītom, kurs ceinejuos i spēja paceļt goru apleicejim cylvākim. Eistyns i patīss. Seimaņs Putāns ir legenda i tai ari paliks! Cauri unikalūs muokslinīku bolsim tiks cauri tys, kū Putāns ir radejs pyrma godu! Nimoz narunojūt par komandys sastuovu, kas sasalasejs, struodojūt pi ituo projekta. Latgolyss pērlis i tautā cīneiti muokslinīki – snsis, Gustavo, Juoņs Skuteļs –, kuri beja natycami atsauceigi i pīsavīnuoja mums itymā pīdzeivuojumā. Sekojit leidza jaunuokajom ziņom i sasateikam “Gorā”,” aicynoj Ūga, īroksta i koncertizruodis rodūšuo vadeituoja.