Latgolys grafikys simpozeja izstuodis atkluošona
Pīktdiņ, 24. martā, 16.00 stuņdēs Daugovpiļs Marka Rotko muokslys centrā piec div nedeļu intensiva dorba studejuos tiks atkluota 11. Storptautyskuo Latgolys grafikys simpozeja nūslāguma izstuode i sveikti tuo dalinīki.
11. Storptautyskais Latgolys grafikys simpozejs nūteik Daugovpilī nu 10. da 24. marta, puļcejūt deveņus muokslinīkus nu Pūlejis, Italejis, Nīderlandis, Vuocejis i Latvejis i nūdrūsynojūt goda leluokū storptautyskū grafikys medeja nūtykumu Latgolys regionā.
Div nedeļu intensivā rodūšā dorbā muokslinīki roda kompozicejis, kas teik nūdūtys skateituojim simpozeja nūslāguma izstuodē, īzeimejūt grafiku individualūs rūkrokstus i paruodūt grafikys medeja plašū tehniskū daudzveideibu.
Giunūt īdvesmi Latgolys ainovā i Daugovpiļs urbanajā telpā, diskusejuos i darbneicuos, muokslinīki Roberts Rabejs (Pūleja), Kamils Adamus (Pūleja), Zenons Balcers (Pūleja), Ināra Petruseviča (Latveja), Liena Bondare (Latveja), Sidharths Pathaks (Nīderlande), Ineke Domke (Vuoceja), Džanluka Arienti (Italeja), Marko Poma (Italeja) turpynoj grafikys muokslys medeja īdzeivynuošonu Daugovpilī i Latgolys vuorda nesšonu storptautyski.
Simpozeju reikoj Daugovpiļs Marka Rotko muokslys centrs sadarbeibā ar SIVIA ar REACT EU finansiejumu i Daugovpiļs vaļstspiļsātys pošvaļdeibys atbolstu.
Izstuode turpynoj Rotko centra 10 godu jubilejis izstuožu programu i byus daīmama apmaklātuojim leidz ituo gods 21. majam.
Atkluošonys pasuokumā izstuode skateituojim daīmama bez moksys.