Nu 14. oktobra da 14. novembra Dagdys kulturys centra Facebook lopā kotru pyrmūdīni i catūrtdīni 20.00 stuņdēs bārni i jūs vacuoki varēs klauseitīs latgalīšu literatis Egitys Kancānis saraksteituos “Jaņča puorsokys”, kū skaiteis Kruoslovys nūvodā zynomi cylvāki. Taipat bārnim byus aizdavums kotru nu puosoku izzeimēt i beiguos atvest sovus dorbus iz puosoku vokoru nūslāguma pasuokumu 17. novembrī, kurā pīsadaleis ari grupa “Rupuči”.

Dagdys kulturys centra pasuokumu organizatore Solvita Plivča stuosta, ka patriotisma mieneša puosoku vokori pi jūs teik reikuoti jau catūrtū godu, tok itei ir pyrmuo reize, kod puosokys tiks skaiteitys latgaliski. “Suocem tūs kovida laikā, kod mes kai kulturys centrs navariejom puorstuot dorbuotīs i vajadzēja dūmuot vysaidus breinumus. Pyrmajā godā, kod vysim beja juosēd sātā, puosokys skaitejom mes poši – kulturys darbinīki. Kotrys pats sātā īraksteja kaidu latvīšu tautys puosoku. Lyudzem, lai bārni tuos ari zeimej, i vīnu zeimiejumu izlūzis kuorteibā apbolvuojom,” jei skaidroj idejis aizsuokumu. Ari tod, kod pandemejis īrūbežuojumi vaira nabeja tik leli, izsprīsts, ka vajadzātu itū iniciativu turpynuot. Bārnim cīši pateikūt, taipat tīšsaistis formata deļ var īsasaisteit na tik Dagdys apleicīnis, tok ari cytur dzeivojūšuos saimis. Laika gaitā izdūmuoti ari vysaidi papyldynuojumi – pārņ puosokys skaitejuši apleicīnē aktivi tāvi, itūgod īsaisteis Kruoslovys nūvodā zynomi ļauds. Vysus Solvita grib paturēt nūslāpumā, lai byutu interesantuok gaideit nuokušū puosoku, tok vīnu atkluoj – tys byus Kroma kolna bruolistis dybynuotuojs Aleksandrs Lubāns.

Itūgod izsprīsts, ka puosokys juoskaita latgaliski. Kai zynoms, vacuoki nareši izalosa ar bārnim latgaliski narunuot, partū gribīs lai jī ar latgalīšu volūdu sasatyktu koč itaidā formatā. Tok, kai soka Solvita Plivča, nav nimoz bejs tik vīglai atrast, kū skaiteit. Egitys Kancānis saraksteituos “Jaņča puorsokys” izalaseitys, kam ruodejušuos myusu dīnu bārnim vysvaira saprūtamys. Ar sovim bārnim Annai i Jaņčam veļteitajom puosokom literate Egita Kancāne divejus godus piec kuortys pīsadalejuse konkursā “Latgolys prozys skaitejumi”, tuos var atrast i puorskaiteit portalā lakuga.lv. Da ituo beja pīraksteitys četrys “Jaņča puorsokys”. Piec Dagdys kulturys centra lyuguma Egita ar bārnim sarakstejuse vēļ sešys, kuruos niu ari pīdzeivuos sovu pyrmatskaņuojumu.

Bārnim kotru izzeimātū puosoku juolyudz vacuokim nūfotografēt i dalikt pi attīceiguo Facebook īroksta komentarūs. Tok ari pagaisynuot originalus navajadzātu, kam 17. novembrī 15.00 stuņdēs Dagdys kulturys centrā gaidoms pasuokuma nūslāgums ar grupys “Rupuči” pīsadaleišonu. Ari itūgod puosokys klauseitīs i zeimēt drūsai aicynuoti bārni nu vysu pasauļa molu, na tik Dagdys pusis. Nūslāguma pasuokumā dorbus viertēs kai vysi puosoku skaiteituoji, tai tūs autore Egita Kancāne ar sovim bārnim.